Tur zip pa tas a disparsé den prizòn

Tabata trahando tas pa e muchanan di Little leaque

1358
Willemstad— Ya tin algun dia ku bewakernan di Prizòn a pone trabou abou i ta akudí na sede di nan sindikato despues ku a trese padilanti ku a yama nan ladron.

Despues di a tende e ekspreshon di ladron ku segun e bewakernan den prizon a ser yama Vigilante a bai hasi algun investigashon ku a duna komo resultado ku enbèrdat tin un kantidat di artíkulo ta pèrdè den e instituto. Esun último ku sigur esnan na kabes no por a biba kuné ta ku tin algun detenido ku ta hasiendo un tremendo trabou den e instituto na unda nan ta kose tas i paña. A yega na e idea pa laga e grupo aki kose tas pa e muchanan di Little League di manera ku esaki ta sali mas barata i tambe e detenidonan tin algu pa nan hasi den e parti di resosialisashon. A bin resultá ku tur zip ku tabata destiná pa pone nan e tasnan a disparsé esta ku esaki a ser hòrta. Esaki a pone ku a bisa ku ta e bewakernan a hòrta e zipnan bai kuné ya ku sigur e detenidonan no por tin nada di bai hasi ku e zipnan. Asina por sigui bisa kuantu artíkulo mas tabata pèrdè for di den kushina.

Tambe a bin tuma nota ku tin bòikòt dor di e trahadónan di prizon mes. For di dia ku a bira konosí ku Drone ta ser usa pa baha droga i tambe otro artíkulonan den e instituto a kuminsá forma timnan pa traha den e warda di anochi pa asina trata di kontra arestá e bahada di drone den prizon. Un kantidat di bewakernan ku ta ser apuntá pa traha den e warda  pa interseptá e drone ta keda sin presentá òf ta indiká ku nan ta malu pa e warda ei. Mesora a lanta e pensamentu ku por tin yudansa di parti di e bewakernan mes dor di keda sin presentá  pa asina e drone por sigui baha den prizòn.

Tambe a bin resultá ku tin diferente bewaker ku ta subi warda i ta prek pa asina mustra ku nan a bin traha pa despues baha bai esta ku no por haña nan niun kaminda te na final di e warda. Tur esakinan a yega na konosementu di mando di Prizon i awor ku a kuminsá ku un investigashon un kantidat di bewaker a wèlga, esaki ta loke a wòrdu trese padilanti. Te ku ayera nochi no tabatin bewaker i mester a hasi petishon na e tim di Riot di Kuerpo Polisial pa yuda ku e parti di vigilansha den Prizòn. Awe Gobièrnu a laga entamá un huisio sumario kontra di e bewakernan ku ta den wèlga pa asina korte ordená nan pa retorna nan trabou.