Ámbos ta optené nan promé punto di kampionato aktual…. Victory Boys i Inter Willemstad a parti punto djasabra

272
Gersinio ‘Ziño’ Constancia anotador di e gol di Inter Willemstad.
BRIEVENGAT – Den un enkuentro di no muchu nivel ku a tuma lugá den stadion Ergilio Hato i ku a ser dirigí pa e árbitro di mil kampaña, Edsel Dimie, e muchanan di Victory Boys i esnan di Inter Willemstad ta hasi kos di ruman ku otro djasabra último.

Djasabra tras di lomba e kampionato di futbòl lokal su promé divishon a kontinuá ku e di dos fecha bálido pa e promé buèlta i tabata e ekipo di Inter Willemstad ku a riska muchu mas tantu den e enkuentro, bayendo mas den atake, pero tabata e ekipo di Victory Boys ku ta sorprendé nan na di 21 minüt di e enkuentro ora ku Gedison Zink ta anotá e gol pa manda su ekipo ariba 1-0.

E ekipo di Willemstad, ku a kai atras, ta sigui avansá i tabata e veterano Gersinio ‘Ziño’ Constancia  ku ta los un tremendo fúsil ku pia drechi pa empatá e enkuentro na di 45 minut i enkuentro ta sosegá empatá 1-1.

Den e di dos mitar no tabatin muchu kambio pa loke ta e nivel di wega i e ekipo di Victory Boys ta desperdisiá algun oportunidat di anotá miéntras ku di parti Inter Willemstad esaki tabata e kaso tambe.

Di e forma aki e enkuentro ta bin finalisá den un empate i ámbos ekipo ta optené nan promé punto di e kampionato aktual.