Bruder ku a pasa pa dòkter a duna tratamentu ku honing na herida

Sin ku dòkter di kas mes tabata na altura:

285
WILLEMSTAD—Den nos edishon di ayera nos a relatá kaso di un bruder ku a pasa pa dòkter i kambia tratamentu médiko ku un pashènt tabata risibí. Ya Vigilante a indiká kaba ku for di e seno familiar ta saliendo detayenan pa lokual ta trata e forma ku a trata nan ser kerí.  Manera ta konosí e pashènt tabata ser atendé pa un bruder di un kas di kuido rekonosé, miéntras ku den fin di siman a bini unu di un instansia priva.

Den siman e 2 brudernan aki a topa ku otro, anto esun priva a introdusí su mes komo dòkter. Den e map ku e famianan por a tuma nota kon e bruder a duna di konosé ku enbèrdat e ta un dòkter. E último aki a pone e bruder na altura ku tin di kambia dedikamentu dje pashènt, kua tambe a ser nota den e map. E señora tabata risibí sierto tratamentu i loke ku e bruder dòkter nep a hasi tabata yama ofisina i pidi e asistente pa kambia e dedikamentu di tal pa honing na e herida. Na momentu ku e la yama e asistente e dòkter di kas mes no tabata konsiente di nada.

Na momentu ku e dòkter di kas mes a sa kiko a sosodé e la ordená pa bai bek e trato i dedikamentu original, pero ya e salú dje pashènt a bai mas atras. No a dura masha ku e pashènt a fayesé i mester bisa ku na e momentunan aki e famianan ta den e parti final di nan investigashon pa entrega un keho na OM pa lokual ku a tuma lugá i ku segun nan tabata motibu ku nan ser kerí a fayesé.