Dimitri Leon ta konkista su di 7 título máksimo di Kòrsou

241
Dimitri Leon ta konkista su di 7 titulo máksimo di Kòrsou.
WILLEMSTAD – Durante henter siman pasá Federashon di Tènis di Mesa Kòrsou tabatin su kampeonato nashonal. Esaki a wòrdu dediká na su miembro di hopi aña, kende ta Onnie Wong.

Un total di 60 hungadó, inkluyendo 4 dama, a kompetí den 4 diferente kategoria, esta B-klas, Master, Dòbel i Senioren, i tur kos a bin kulminá riba djabièrnè. Kosnan a start 8 or anochi ku e partido final di B-klas ku a bai entre Mary Ann Mac Leod i Cai Walters. Mary Ann ta pasa fásil riba Cai ku skor di 3-0.

Seguidamente a sigui e kategoria dòbel entre e faboritonan Devon Meilink i Henny Metry kontra Dimitri Leon i Jaysron Mathilda. E number 2 i 3 di rènken tabata forma un duo ku últimamente tabata kasi inbatibel, pero e biaha aki ku Dimitri na kabes, e ta sa di trèk Jaysron kuné pa nan gana e partido aki ku skor di 3-1.

Pa loke ta e kategoria Master, esaki a bai entre Raymond Begina i Hensley Wentwoord. E 2 veteranonan aki ya pa algun tempu ta bai tur final di Master, kaminda semper Raymond ta sali di porta grandi. Hensley a duna bon bataya pero un biaha mas ta keda kòrtiku ora e ta kai vensí ku e skor di 3-0 ku e parsialnan: 12-10, 12-10 i 13-11.

Finalmente a toka turno pa e plato prinsipal ku Dimitri Leon buskando su di 7 titulo máksimo di Kòrsou. Su atversario Devon Meilink, kampeon na 2015, den hopi evento e aña aki tabata den final kontra Dimitri ganando algun di nan. Pues e ekspektativa tabata altu.

E promé wega a bai pareu i pèrta, kaminda Dimitri ta pika dilanti 1-0 ganando e sèt ku skor di 12-10. Devon ta bòns bèk empatando e wega na 1 ganando e sèt ku skor  di 11-8. Dimitri seguidamente ta saka tur su armanan i pone nan den wega kitando tur inisiativa for di Devon.

Ku e parsialnan di 11-9 i finalmente 11-4 Dimitri ta gana e titulo di Kòrsou un biaha mas ku e skor final 4-1. Banda di e premio komo kampeon di Kòrsou Dimitri a gana tambe e distinshon di Hungadó mas Valioso di 2019. E di 3 naturalmente ta e medaya di oro den dòbel.

Dimitri Leon sigur ta sin duda e mihó hungadó di pinpòn aktualmente na Kòrsou. Asina tambe Federashon a klousura e aña aki ku tur su torneo nan i lo tin su ‘kerstbout’ dia 8 di desèmber proksimo kaminda lo yama danki i tene un momentu plasentero ku su miembronan pa asina sera e temporada 2019 di forma ofisial.