Good Corporate Governance na CBCS ta kousando problema

1139
Ys: den liñanan di kondishon imponé pa Corporate Governance, no ta responsabel mas pa Etienne Ys keda komo presidente di Hunta na CBCS.
Skalo—Kodifikashon di Bon Gobernashon i Maneho, “Good Corporate Governance” ta un eksigensha vital pa por mantené órden i liña di outoridat den un organisashon. Minister Kenneth Gijsbertha i MAN a kometé dos fayo serio ku tei okashoná desórden i afektá nan imáhen polítiko. Ta trata na promé lugá e inabilidat di keda sin intervení den e konflikto ku tabatin na Banko Sentral i intentonan pa  renombramentu di Steven Martina komo minister.
21 novèmber:  último Gijsbertha a sali den medionan di komunikashon despues di un diskurso riba Corporate Governance. E minister no ta aktuando den Banko Sentral lokual ta formando un peliger pa su partido polítiko.

Siman di 21 di novèmber último, minister Gijsbertha tabata presente na un diskurso riba Corporate Governance. Tog, Gijbertha ta kometiendo un fayo ku mayoria si no ta tur minister ta kometé. Violashon serio di por mantené bon kondukta di maneho. Aktualmente den banko sentral na Skalo tin un krísis serio di deskonfiansa, esaki kousá pa motibunan ku MAN i Gijsbertha no a intervení na tempu.  Pa bon prinsipionan di Corporate Governance, Minister di Finansas, Gijsbertha mester  laga skrin Etienne Ys komo presidente den Hunta di Supervishon na CBCS.

E ta importante pasobra e kompania responsabel pa sakeo di e bolsa na Leven Schade i Zorg di Ennia ta Parman International BV. Parman ta doño di Ennia i Ys tabata unu di nan konseheronan prinsipal na Kòrsou. Parman ta doño tambe di Ennia Caribe Holding kende na su parti ta doño di EC Investments. EC Investments ta doño di Sun Resorts, kual ta e kompania ku ta manehá Mullet Bay. E tereno na Mullet Bay aktualmente ta tópiko di investigashon penal na St. Maarten i awor tambe den e problematika na Banko Sentral.  Den bukinan di Ennia Caribe Holding, Mullet Bay ta balorá na 460 mion dòler, pero en realidat e terenonan no tin balor fiskal debí ku ta trata di tereno nan erfpacht ku despues a wòrdu trasladá. En todo kaso e balor ta unu fiktisio i via dje balor aki konseheronan di Ansary a logra trasladá e depósito di kèsh pa garantisa aseguradonan, pa subi kuentanan di invershon pafó di Kòrsou i pafó di supervishon via CBCS. Awor, tantu CBCS komo Gijsbertha ta  den un posishon prekupante.  Nan propio presidente a yega di fungi komo konsehero di un kompania, kual nan mes ta yudando Minister Públiko pa investigá. EC Investments BV, pa kende korte sivil a emití un medida di emergensha, ta doño di NiBanc. Ys a fungi komo konsehero aktivo riba lista komo kréditor di NiBanc. Ys tabata duna konseho na mesun kompania ku e dianan aki ta formando un problema serio na Banko Sentral. E problema ku Gijsbertha i MAN a evitá na konfrontá, awor ta bini bek riba nan i si nan no hunga e kartanan bon lo kousa un káos den kabinete Rhuggenaath.

Na St. Maarten, funshonarionan hudisial a listra i laga pone beslag i derechinan hurídiko riba 13 propiedat. Ta trata di propiedatnan di Hushang Ansary via di Sun Resorts, esei inkluso Mullet Bay Towers. Pa Corporate Governance, gobièrnu mester instalá un komishon pa investigá si presensha di Ys por afektá desishonnan tuma durante ehekushon di e Medida di Emergensha. Esaki no a sosodé nunka. Mas aleu, Ys riba su mes mester a distansha su mes fo’i na momento e problemanan a kuminsá bini. N’e momentunan aki, unu tin sospechonan di aktonan kriminal, riba balotashon haltu pa e tereno di Mullet Bay. Asina Ennia Caribe Leven por hustifiká sakeo di aktivo via di EC Investments. EC Investments, e.o. a traha huntu ku NiB Bank i Sun Resorts, kual último kompania ta manehá Mullet Bay. Etienne Ys a traha 8 aña na NiB komo konsehero finansiero di e grupo di Ansary i Ennia Caribe Holding. Sun Resorts, EC Investmens i NiB ta bou di e mesun ala den e organisashon di Ansary i Parman Group. E liña di konekshon aki, ta pone Ys direkt den un posishon kuestioná pa lokual ta trata Corporate Governance. Kon Hunta di Komisario na Banko Sentral por atendé e problema awor ku Etienne Ys mes ta nan presidente di Hunta. N’e momentunan aki tin un konflikto serio den Hunta di Maneho na Banko Sentral i presidente direktor Bob Traa no ta kontentu. Ulanda for di desèmber 2016 via Den Haag a duna ordená pa drenta Banko Sentral na Kòrsou i St. Maarten. Si e proseso aki no konkretisá lo tin konsekuensha polítiko na Kòrsou.