Mas di 300 agente polisial heridá durante protestanan na Colombia

117
For di djaweps siman pasá e protestanan aki a inisiá aya na Colombia.

BOGOTA – Un total di 341 agente polisial a resultá heridá durante e kuater dianan di manifestashon na Colombia kontra e polítika di e gobièrnu di e presidente Ivan Duque, mayoria di nan na Bogotá i na e departamento di Valle de Cauca.
Outoridatnan a detayá ku e 341 kasonan, 232 a sosodé na Bogota i 64 na Valle del Cauca, kua su kapital departamental ta Cali. Ta trata aki netamente di e dos regionnan unda e mayor desòrdu i disturbio a keda registrá durante e protestanan.
Durante e manifestashonnan 14 agente polisial di e departamento di Cundinamarca, 9 na Santander, 8 na Antioquia, 5 na Caldas i 3 na Nariño, entre otro.
For di na momentu ku e protestanan a inisiá, te ku awor, outoridatnan a reportá ku un total di tres persona a pèrdè nan bida i otro vários shen a resultá heridá rònt e pais.
Den e kaso mas grave, kua a keda registrá den oranan di djasabra tras di lomba na Bogotá, un hóben identifiká komo Dilan Cruz, di 18 aña, a resultá gravemente heridá pa un miembro di polis ku a lòs un tipo di bòm disturbiadó, kua a gòlpi’é na altura di su kabes.
E kaso aki a generá krítikanan di vários sektor ku ta konsiderá e kaso aki komo un ekseso di uso di forsa di parti outoridatnan, kritikando esaki i otro akshonnan kontra esnan ku tabata manifestá di forma pasífiko.
Di mesun forma, esaki nan a sòru pa agresividat entre e abitantenan di Bogotá, kendenan posteriormente a subi kaya hasiendo uso di wea, bandera i instrumentonan musikal pa eksigí e gobièrnu un kontesta pa ku e reklamonan sosial i ekonómiko.
Pa ku e situashon aki, Ministerio Públiko a habri un kaso di investigashon pa klaresé e kaso i a atvertí ku lo no pèrmití nada dor di sla òf ilegal.
Loke a kuminsá komo un simpel paro nashonal, konvoká pa djaweps siman pasá pa sentronan obrero kontra posibel reformenan laboral, di penshun i tributario, entre otro, a transformá su mes den un movementu ku kada dia ta haña mas i mas forsa a via di konvokashonnan riba retnan sosial.