PASKU FIESTA DI LUS 2019 DEN LUS DI E SPERANSA NOBO

147

Willemstad- E aña aki atrobe Pasku Fiesta di Lus ta kontribuí na trese e ambiente tradishonal di e selebrashonnan di fin di aña. Ministerio di Tráfiko, Transporte i Desaroyo Urbano, Ministerio pa Desaroyo Ekonómiko i Aqualectra a bolbe uni forsa i esfuerso pa krea un ambiente festivo den nos sentro di suidat i na algun sitio hopi trafiká riba nos isla. Den sentro di suidat a konsentrá esfuersonan di Wilhelminaplein pasa Breedestraat subi brùg Emma, baha riba Brionplein te ku viadukto. E tema di e aña aki ta e deseo grandi di nos pueblo pa un Kòrsou den su gloria, kargá pa fe i speransa. E aña aki banda di lus a añadí elementu di zonido ku músika di fin di aña kombiná ku un presensha riba medionan sosial kaminda un i tur por partisipá. Djaweps dia 28 di Novèmber próksimo pa mitar di 7 or di anochi Minister Jesus-Leito i Minister McWilliam lo sende e lusnan pa duna e toke speshal na nos sentro di suidat. Un invitashon ta bai na un i tur, pa kompañá nos riba e dia aki durante di e apertura i pa bishitá Punda i Otrobanda, baha kana i gosa di e ambiente úniko di Pasku Fiesta di Lus den nos sentro di suidat.  

Un eksperensha rondó di Korsou den su gloria ku fe i speransa

Tur aña di nobo e organisadónan di Pasku Fiesta di Lus ta purba di trese inovashon. Pa esaki ta wak kiko a traha bon durante añanan, kiko tin den mundu ku ta apto pa nos implementá i tambe kiko por ta un mensahe ku ta pas ku e momentu ku nos ta biba. Ta den e kuadro aki e tema rondó di kua Pasku Fiesta di Lus ta konsentrá ta e deseo grandi di nos pueblo pa un Kòrsou den su gloria, kargá pa fe i speransa.  P’esei na inisio di Wilhelminaplein, na e porta di Willemstad, tin e palomba ku ta trese e mensahe di bon notisia. E adorno di Wilhelminaplein ta tipifiká e fe i speransa ku nos tin miéntras nos ta selebrá e fin di aña. Kaya Grandi di Punda i Otrobanda, kombiná ku brùg Emma ta e pasashi pa e Kòrsou den su gloria riba Plasa Brion. Brùg Emma su lusnan ta keda baila riba ritmo di kansionnan di fin di aña.  Riba Plasa Brion tin un Plataforma di 40-meter largu i 10-meter haltu riba kua a kombiná artefaktonan típiko di Pasku, wega ku lus i video pa krea un espektákulo manera bo sa eksperenshá na suidatnan grandi den mundu.  Tur ku pasa den kayanan di Punda, subi brùg i Plasa Brion ta keda deleitá ku músika di fin di aña. E lusnan riba brùg lo tin momentunan ku ta baila riba ritmo di e músika. Kada anochi tin shownan kòrtiku den e bentana di e kas di kunuku riba e stage. Tur esaki ta hasié interesante pa bo sali kas ku famia i amigu, bin Punda i Otrobanda i kana gosa di e tremendo ambiente aki.