SDKK ta para ketu na Siman Internashonal kontra Agreshon i Violensia

101
 WILLEMSTAD— Grandinan a yega di deklamá “E spiritu ta for di e bòter i nos tin ku dun’é kaminda pa e sigui kana”. Den e siman aki nos tin ku para ketu pa asina huntu nos kombatí un di problemanan ku diariamente ta tópiko di atenshon den nos komunidat. Ku e ekspreshon aki Sentro di Detenshon i Korekshon a para ketu na e siman internashonal kontra di agreshon i violensia.

Personanan ku ta traha den e kadena hudisial òf kualke sektor kaminda bo tin ku duna servisio, tardi òf trempan, por wòrdu konfrontá ku agreshon ku por resultá den violensia. Tin diferente variashon pa ku komportashon agresivo i/òf violento. Ta konosí ku ta eksistí diferente forma di agreshon ku ta entre otro agreshon ekspresivo (dirigí riba un situashon òf un organisashon), agreshon frustrá (ora ku agreshon ekspresivo no wòrdu atendé bon e por finalisá den pèrdèmentu di kòntròl riba e propio komportashon i resultá den violensia), agreshon instrumental ( ora hasi uso di agreshon konsientemente den forma di menasa pa logra un sierto meta) i agreshon inkontrolabel (e forma di agreshon aki ta ora ku un hende no ta komprondé e realidat, ta imprevisto i ta bira violento hopi lihé). Kada un di e formanan di agreshon òf violensia aki ta rekerí un manera úniko pa atendé ku n’e.

Ta demostrá ku ora ta trata di agreshon òf violensia semper ta bon pa hasi un par di kos: mustra komprenshon pa e situashon i usa un aktitut pa solushoná e problema. Esaki no ta nifiká ku ta tolerá agreshon ni violensia. Na di dos lugá ta pa tuma e situashon na serio i trata na dialogá ku e hende ora e ta mas trankil. No ta salú pa bai den diálogo ku un hende ku emoshonalmente no ta dispuesto pa skucha bo. Na di tres lugá bo mester ta konsekuente den e manera ku bo ta atendé ku e situashon. Es desir mester ta bon kla ku no ta tolerá agreshon ni violensia i ku esaki lo no yuda solushoná e problema. I na di kuater lugá, por buska ayudo den forma di por ehèmpel yama polis.

Tin ora agreshon i violensia ta inisiá dor di kosnan masha simpel ku hopi biaha nos no ta para ketu na dje ku ta entre otro mal uso di poder dor di menasa, manipulashon, tentamentu i ekspreshonnan denigrante.

Ta konosí ku hopi biaha agreshon òf violensia ta kuminsá den kas di famianan, despues e ta plama bai den e bida sosial diario bou di amigunan òf pareha. Echo ta ku hopi biaha un persona ku hasi su mes kulpabel na agreshon òf violensia hopi biaha e mes tabata òf ta víktima di esaki. I importante ta pa tur organisashon, servisionan i institutonan ku ta traha ku hende, traha i kolaborá ku otro, pa asina huntu yuda baha i/òf eliminá mas tantu agreshon i violensia ku ta posibel na boka di trabou i prinsipalmente na Kòrsou.

SDKK lo sigui hasi tur esfuerso pa yuda prevení, señalá, notifiká esnan i outoridatnan konserní pa asina yuda otro pa stòp agreshon i violensia den nos komunidat. E parti primordial despues di tur esakinan ta kon ta yuda otro rekuperá na un manera salú i positivo di agreshon i òf violensia i haña e guia nesesario den e kuadro aki.•