Dil Ulandes a kondusí na morto di Helmin Wiels ( part III)

8454
Lek: Vigilante a publiká fo’i inisio ku un lèk den RST a kondusí na morto di Wiels. Sigui lesa e seri di artíkulonan publiká e dianan aki den Vigilante.
Punda— Esaki ta e di tres artíkulo den un seri eksklusivo ku Vigilante ta bai publiká riba asesinato di Helmin Wiels i dikon Ministerio Públiko a tene pa hopi aña sekreto, kòmbersashonnan ku Wiels a hiba ku RST (lesa hustisia ulandes). Helmin Wiels a papia ku un hòmber ku yama Eric Kok. Pa komprondé kiko Wiels a papia ku Kok, mester bai bek 1 aña,  promé ku e fecha di 5 di mei 2013, e dia Wiels a fayesé. E enkuentro ku Wiels a hiba ku Eric Kok di RST,  no a keda sekretu, el a bin lèk.
Misterio: Ministerio Públiko ta atmití ku Wiels a papia ku e hòmber Eric Kok promé di a fayesé. Riba e foto por mira Eric Kok dia polis a pone un rueda di prensa pa informá prensa riba morto di Wiels.

Helmin Wiels a kuminsá papia na inisio di 2013 ku Eric Kok. E promé kombersashon a tuma lugá den e stashon di radio na Caracasbaaiweg. Tin diferente hende a konfirmá e kòmbersashonnan entre Wiels i Kok. Kade Wilsoe ta unu di nan, un eks bodyguard di Wiels, un funshonario polisial  i tambe dos ruman di Wiels a konfirmá e kòmbersashonnan. E kòmbersashonnan entre Wiels i Kok, kende tabata teamchef (hefe) na RST a tuma lugá algun luna despues di e atrako grandi riba bara di oro den haf di Kòrsou(kaso Summer Bliss) pero tambe despues di e atrakonan di oloshi Rolex na Aruba i na Kòrsou . Tantu Wiels komo Kok, a tene e kòmbersashonnan sekreto pasobra no tabata kumbiní Wiels pa su siguidó nan sa ku e tabata trahando un dil ku un ulandes, miéntras Kok tabata “as” riba un posishon den  Ministerio di Hustisia na Kòrsou, despues ku e baha na yüni 2013. Pues tantu Wiels komo Kok, tabatin benefisio na tene e kosnan sekreto.

Splika: Navarro tabata huntu ku Eric Kok na e rueda di prensa riba 10 di mei 2013. Un luna despues Kok a bira su konsehero, pero Navarro nunka por a bisa ta ken a pone Kok einan.

Kade Wilsoe: “ ma taha Helmin di papia ku RST. Komo eks minister di hustisia, mi tabata sa kon na ta traha”.  Kade Wilsoe tabata eks minister di hustisia pa Pueblo Soberano durante e kabinete di Schotte. Despues di e problemanan entre Pueblo Soberano i MFK na terser kuartal di 2012, Helmin Wiels a kuminsá deshasí di e idea pa mantené e kartera di hustisia, lagando Kade Wilsoe for di e siguiente kabinete di profeshon. Den un desishon sorpresivo, durante negosashon entre Pueblo Soberano, PAIS, Glenn Sulvaran (individual) i Nashonal, Ivar Asjes ta laga e kartera di hustisia kai pa duna PAIS e posishon. Riba 31 di desèmber 2012, Navarro ta huramentá komo minister di hustisia. Te awe, Pueblo Soberano ni Wiels nunka no a duna un motibu públiko dikon a laga e kartera di hustisia kai, pero despues ta bin sali na kla ku un investigashon kontra di Jorge Jamaloodin tabata probabel. Esaki lo a pone hopi preshon polítiko riba Pueblo Soberano i manda mas ola i krítika fo’i skina di MFK. Wiels kier a keda leu fo’i dje polémika ei i laga PAIS i Navarro atende kuné. Despues ku Wiels a fayesé, Eric Kok a keda apuntá komo konsehero den Ministerio di Hustisia. Segun Nelson Navarro, “ami no sa di unda ni kon bini Kok por a bira mi konsehero”.  Segun Navarro e la bin hañ’é ku Kok riba dje sin nunka a sa ta ken realmente a pone Kok komo su konsehero.

Segun Kade Wilsoe, Eric Kok tabata bai serka Helmin Wiels pa haña un posishon komo konsehero di minister di hustisia. Wilsoe: “ora mi puntra Helmin dikon e ta papiando ku e funshonario di RST el a benta mi leu i bisami ai, ta un posishon e hòmber ta buskando ora e baha”. E deklarashon aki di Wilsoe por ta kuadra pasobra en bèrdat despues ku Navarro a prolongá su posishon komo minister di hustisia den kabinete Asjes riba 7 di yüni 2013, Eric Kok algun siman despues a bira unu di su konseheronan. Riba 10 di mei 2013, durante un rueda di prensa na Rio Canario pa informá riba e asesinato di Wiels, Eric Kok tabata sintá na mesa huntu ku alto hefenan di polis na Kòrsou. . Algun siman despues, Kok tabata bin trabou den un BMW blanku nobo bin bishita i reuní ku Navarro. Kon por ta posibel ku Kok tabata konsehero di Navarro sin nunka Navarro mes tabata sa ta ken a pone Kok einan. Ken a traha e dil pa Kok? Wiels entretantu tabata derá den santana na Wishi i no por a duna splikashon. Ministerio Públiko tampoko no ke duna niun deklarashon ta ken a regla pa Eric Kok bira konsehero di Navarro. Fiskal Rip ta duna e promé apertura riba pregunta aki. Riba 6 di yüni 2019, Gert Rip ta atmití finalmente despues di 6 aña, ku Eric Kok a papia ku Helmin Wiels. Esaki el a bin hasi durante tratamentu di Maximus, kontra di Jorge Jamaloodin. Gert Rip den korte: “su nòmber no ta Wim Kok, sino Eric Kok. Kok en bèrdat a papia ku Wiels pero nan no a papia nada riba kriminalnan”. Esei Gert Rip a bisa. Kemen, si Wiels i Kok no a papia riba kriminal, riba kiko nan a papia anto? Kiko tabata e motibu dikon Helmin Wiels a tuma riesgo i papia ku un ulandes miembro di RST miéntras e tabata indoktrinando Kòrsou pa no konfia RST, pasobra nan tur ta spion ulandes. Dikon Helmin a despist’a tur su konseheronan i tòg sinta mas ku dos okashon na mesa ku Kok? Kua dil Wiels a traha ku Kok? (lo kontinua).