Dil Ulandes a kondusí na morto di Helmin Wiels (part IV)

2036
Deklará: Eric Kok, eks team chef interino na RST.
Esaki ta e di kuater artíkulo den un seri eksklusivo ku Vigilante ta bai publiká riba asesinato di Helmin Wiels i dikon Ministerio Públiko a tene pa hopi aña sekreto, kòmbersashonnan ku Wiels a hiba ku RST (lesa hustisia ulandes). Helmin Wiels a papia ku un hòmber ku yama Eric Kok. Pa komprondé kiko Wiels a papia ku Kok, mester bai bek 1 aña,  promé ku e fecha di 5 di mei 2013, e dia Wiels a fayesé. E enkuentro ku Wiels a hiba ku Eric Kok di RST,  no a keda sekretu, el a bin lèk.
Yüni 2012: defuntu Pretu Florentina a yega di ekspresá su rabia riba Helmin Wiels den bario di Koral Specht. Florentina tabata organisá robo di oloshi hòrtá i segun Ministerio Públiko, tabata bende e oloshinan ku Jamaloodin via di Fonseca. Ministerio Públiko a menshoná un fecha spesífiko ku Florentina tabata serka Jamaloodin. Anochi di 2 di yüni 2012.

E file di Maximus ku ta regardá e dos kondenadónan Burney Nini Fonseca i George Jorge Jamaloodin, en kombinashon ta surpasá 40 mil página di dokumentashon. Den e 40 mil página nan, tin prosès ferbal di testigunan, di funshonarionan di polis, reportero, ekspertonan forensiko, agentenan di inteligensia, funshonarionan di RST, rapòrt di investigadónan profeshonal i sientífiko. Pero niun kaminda no tin un prosès ferbal riba e kòmbersashonnan ku Wiels a hiba serka RST òf serka Eric Kok. Esaki ta konkluí ku e kòmbersashonnan di Wiels i Eric Kok, tabata un sekreto skondí pa Ministerio Públiko te na momento Gert Rip, despues di 6 aña a bin atmití den korte ku Kok i Wiels tabatin interkambio. Pero ainda, Rip no a divulgá kontenido di e interkambionan.

Eric Kok tabata bayendo Ulanda pasobra su tèrmino di servisio a finalisá na Kòrsou. E tabata “team chef” interino na RST. Pero Kok, no tabata kier a bai bek i tabata as riba un posishon pafó di e kuerpo di RST. Durante mesun temporada ku Kok tabata bayendo e la papia ku Helmin Wiels. Kok i Wiels a papia riba un posishon nobo p’e den hustisia na Kòrsou. Esaki ta lokual Helmin Wiels a bisa Kade Wilsoe.  E dos hòmbernan a papia na inisio di 2013, mas spesífiko Kok i Wiels a papia na diferente okashon entre febrüari 2013 pa mei 2013. Durante mesun periodo ku Kok i Wiels a hiba nan kòmbersashonnan, tabatin un guera polítiko fuerte entre MFK i Pueblo Soberano. Wiels a tene e kòmbersashonnan ku Kok den sekretu, pasobra su bodyguard apuntá pa Gobièrnu, Karel “Gachi” Josepha no tabata na altura di e kòmbersashonnan. Ni tampoko su konkubina, Betty da Fonte. Den seno di Pueblo Soberano tabatin algun persona na altura di e kòmbersashonnan.  Durante mesun periodo i promé ku Wiels tabata papiando ku RST i Kok, tabatin robonan di oloshi hòrtá i bara di oro tabata tumando lugá na Kòrsou i na Aruba. Den sirkulo di baho mundu, tabatin indikashon ku Jorge Jamaloodin tabata kumpra oloshi hòrtá serka Burney Nini Fonseca via di Luigi Pretu Florentina. E sospecho ta wòrdu fortalesé tambe dor di tres fuente. E promé ta Gert Rip. Segun Gert Rip, (den korte na Yüni 2019) Jorge Jamaloodin mester tabata kumpra oloshi hòrtá serka Pretu Florentina, pasobra na yüni 2012, Florentina tabata den outo momento a ofresé e oloshinan hòrtá na Jorge Jamaloodin. Esaki a tuma lugá segun Rip riba 2 di yüni 2012. Tin dos fuente mas ku ta konfirmá ku Jorge Jamaloodin tabata paga Burney Nini Fonseca. E pagonan aki, tabata tumando lugá fo’i temporada promé ku Wiels a fayesé. Ta trata di dos eks empleado na Speedy Security, e kompania di Jorge Jamaloodin. Nan a mira tas di sèn  yega Speedy Security i nan a yega di mira Nini Fonseca bai ku sèn, durante dianan promé ku Wiels a fayesé. Ta trata di e eks empleadonan Winklaar i de Windt. Segun e dos hòmbernan for di aprel 2013 nan tabata mira transakshon di kèsh na Speedy unda Fonseca tabatin bin. Mester tene kuenta ku un “side note” importante. Riba 3 di mei 2013, Helmin Wiels ta risibí un sms ku ta bisa: ”awor si bo ta bai h…… Un dia promé ku e sms aki, Luigi Pretu Florentina tabata na St. Maarten den un grupo di amigu disfrutando di karnaval. Direpiente, Florentina despues di a papia na telefon riba 2 di mei 2013 ta bisa su grupo di amigu “mi tin di bai Kòrsou pa kaba un trabou. Florentina ta yega Kòrsou 3 di mei 2013.

Momento Luigi Pretu Florentina a yega for di St. Maarten riba 3 di mei 2013, ya Helmin Wiels i Eric Kok a hiba diferente kombersashon i ya nan a traha un dil ku Kok tei traha pa Nelson Navarro komo konsehero di minister. Ta promé biaha den historia di Kòrsou, ku un eks RST’er ta bira konsehero di minister. 7 di yüni 2013, Nelson Navarro a huramenta komo minister den kabinete Asjes i algun siman despues, Eric Kok a stashoná su BMW blanku nobo den Punda i kana bai direkshon ofisina di Navarro. Helmin Wiels a regla e posishon pa Kok promé di a fayesé i laga Kade Wilsoe afó komo minister di hustisia. Un zèt ku te awe, niun hende den Pueblo Soberano no por komprondé. Wiels a traha un dil ku Kok. E dil aki mester wòrdu investigá promé ku hende inosente sigui kai será pa morto di Helmin Wiels. (lo kontinuá)