Kampionato lokal di futbol su di dos divishon…. Jong Colombia ta suta S.V. Inter 5-1 i New Song ta sorprendé Atomic 1-0

160
Akshon entre Jong Colombia i SV Inter djaluna ultimo na SDK.
BRIEVENGAT – E kampionato di futbòl lokal su di dos divishon a kontinuá djaluna último den stadion Ergilio Hato na SDK ku dos enkuentro.

Primeramente tabata e ekipo di Jong Colombia ku a enfrentá e ekipo S.V. Inter i tabata e ekipo di Jong Colombia ku ta suta e ekipo di S.V. Inter ku skor abulta di 5-1. Pa e ekipo di SV Inter tabata Angelo Lorens ku a hinka e gol di salba honor na minüt 65 miéntras ku pa Jong Colombia, Sugently Martha (‘9, ’73) i Ger-Dangelo Wespel (‘2, ’32), ámbos a anotá na dos okashon, i Sjundrickson Louisa (’35) a anotá na un okashon.

Seguidamente tabata e ekipo di New Song ku a enfrentá e ekipo di Atomic i mester bisa ku akinan e ekipo di New Song ta sòru pa un sorpresa ora ku nan ta gana di Atomic ku skor mínimo (1-0). Tabata e futbolista Aldimar Reigina (’76) ku a skor e gol di viktoria pa e ekipo di New Song.

Awe djárason lo tin dos wega na stadion Antoine Maduro:

E kampionato ta kontinuá awe djárason 27 novèmber ku dos enkuentro, ora ku pa 19:00 e ekipo di FC Sithoc enfrentá e ekipo Deportivo Sta Rosa i pa 21:00 e ekipo di Indekor ta enfrenta Willemstad. Ambos enkuentro ta programá pa tuma lugá na Stadion Antoine Maduro (SUBT).