Pareha asesiná na Haiti tabata di bishita pa adoptá

280
Outoridatnan di e pais no a revelá muchu detaye den e kaso aki.

PORT-AU-PRINCE – Un pareha franses di Ardeche a keda asesiná den oranan di djadumingu atardi, ku un arma di kandela, aya na e kapital haitiano di Port-Au-Prince, unda nan a kaba di yega aparentemente pa realisá un adopshon.
Un funshonario di e embahada di Fransia na Port-Au-Prince, a indiká na medionan di komunikashon ku e fransesnan a keda asesiná, pero no a proporshoná detaye relashoná ku ubikashon eksakto òf e sirkunstansianan di esaki.
Tampoko a indiká e motibunan ku por tabatin pa kometé e asesinato aki, kua a keda realisá na un pais hoga den un krísis polítiko i sosial sumamente grave.
E Ministerio di Relashonnan Eksterior di Fransia a ekspresá den un komunikado, nan lamento pa e kaso aki despues di e mortonan registrá na Haiti komo resultado di agreshon. Esaki a sigurá ku e embahada franses tabata den kontakto ku outoridatnan lokal pa asina por klara e kaso aki mas lihé posibel.
Segun vários fuentenan, e pareha a biaha pa Haiti pa realisá un adopshon. E pareha aparentemente a haña nan promé outorisashon na aña 2013, renobá na aña 2018. Nan biahe a keda organisá ku e propósito di un bishita di kombibensia pues ainda no tabata kla pa por regresá ku e menor di edat.
Kada dia, Haiti ta hundi mas den un krísis sosial i polítiko grave. E protestanan konstante, kargá na mayoria okashon di violensia, pa reklamá renunsia di e presidente Jovenel Moise for di luna di ougùstùs i tambe pa violensia di gengnan, kua tin e sosiedat sivil preokupá.