“ Pulga Atomico” ku otro “show” den Camp Nou

79
Fot leo:  Ora Lionel Messi bini mitar den forma su ta doló di kabes pa kualke ekipo na mundu. Ayera “ Pulga Atomico” a pone otro show den su tèmpel ku ta Nou Camp. Chek kuantu defensa ta rondoná e mihó di mundu.

 

BARCELONA, – Otro anochi mágiko di  Leo Messi pa bolbe guia  FC Barcelona den partido di Champions League.  Triunfo sólido, konvinsente i kaba na promé lugá di nan respektivo grupo ta loke Futbòl Club Barcelona a logra despues di ganá Borussia Dortmund ku skor di 3-1 den Camp Nou.

E ekipo di  Dortmund kende no ta pasando den nan mihó momentu simplemente no a demostrá kasi nada den promé mitar, miéntras ku e astro argentino a bolbe kombertí su mes den e gran protagonista dje partido duna un lès di futbòl.

Messi aparte di skor un gol riba asistensia di Luis Suarez tambe a duna dos asistensia, di kua ta na e propio Suarez i tambe Antoine Griezmann. Porfin e trio di Messi, Suarez i Griezmann a funshoná di kua ta algu ku ta duna e mister, Ernesto Valverde, sierto speransa.

Pa loke ta “ Pulga Atomico” mester duna di konosé ku  e la asistí i skor, miéntras ku e la pone  Camp Nou un biaha mas na su pianan.

Pa loke ta Borussia Dortmund mester agregá ku e ekipo a hunga un partido tímido den promé mitar i parti dje komienso di e di dos mitar, pero ku entrada di Jadon Sancho den di dos mitar e ekipo aleman su aspekto di wega a kambia konsiderablemente. E talento kambia e wega dje ekipo aleman i a skor un tremendo gol.

Pero Dortmund no por a yega mas leu ku un gol danki  na otro gran partido di e kiper aleman, Marc Ter Stegen, ku a skapa e ekipo Catalan na numeroso okashon.

Kosnan Importante dje Partido:

FC Barcelona: Ter Stegen; Sergi Roberto, Umtiti, Lenglet, Junior; Rakitic (Vidal, 77′), Busquets, De Jong; Messi, Suárez (Wague, 91′) i Dembelé (Griezmann, 26′).

Borussia Dortmund; Burki; Piszczek (Zagadou, 75′), Akanji, Hummels, Schulz (Sancho, 46′); Weigl (Götze, 85′), Witsel, Brandt; Guerreiro, Achraf  i  Reus.

Golnan:  1-0: Suárez (29′). 2-0: Messi (33′). 3-0: Griezmann (67′). 3-1: Sancho (77′).

Rèfri: Clément Turpin (Fransia).  E la duna karchi hel na  Messi (51′), Busquets (71′), Guerreiro (74′).

Insidensianan: Partido korespondiente na e di sinku  hornada dje fase di grupo di  Champions League disputa den  Camp Nou dilanti di  90.071 fanátiko.