Watakeli a pasa den sustu kontra Wishi Tigers djaluna

226
Akshon di enkuentronan di vòli djaluna último den sala Errol Rooi.
BRIEVENGAT – E kampionato di Vòlibòl a kontinuá djaluna último den Sala Errol Rooi ku diferente enkuentro bálido den tantu klase A Femenino, komo tambe klase A Maskulino i e resultadonan tabata lo siguiente.

Klase A Femenino: Den klase A Femenino e ekipo Shuatanari mester a lucha fuerte kontra e ekipo Xaverianen pa finalmente bin gana e wega 2-1 ku parsialnan 25-16, 16-25 i 15 -8. Xaverianen tin algun hóben prospekto ku bon altura ku nos lo por bai tende hopi di nan den futuro. Den e di dos wega den sekshon Femenino A djaluna último, e damanan di Watakeli ta gana e damanan di Jumping Jewels ku skor di 2-0 (25-19 i 25-18. Watakeli su ala Femenino tambe ta birando un kos serio.

Klase A Maskulino: Pa loke ta e kategoria maskulino, den klase A Maskulino e ekipo Xaverianen a enfrentá e ekipo Stakamahakchi i tabata Stakamahakchi ku a sali di e porta grandi lagando Xaverianen atras desepshoná . E wega aki a kaba ku skor di 2-0 ( 25-18 i 25-20).

Den loke tabata e último wega di djaluna anochi ku a bai entre e ekipo Wishi Tigers i e ekipo Watakeli, kosnan tabata sumamente kayente! E ekipo di Watakeli ta sali kita e promé sèt fo’i man 25-19 pero Wishi ta bòns bèk i kué e di dos sèt 25-18.

E di tres i último sèt a bira un bataya fuerte kaminda ta tin rèli nan largu kombiná ku atake nan fuerte di ámbos banda di e nèt. Pero finalmente e di tres sèt a bin kaba ku un diferensha mínimo di 15-13 na fabor di e ekipo Watakeli ku a pasa den sustu di nan bida.

Awe nochi 8’or e kampionato klase A ta kontinuá ku 2 wega den sala Errol Rooi:

E kampionato ta kontinuá awe anochi 8’or den Sala Errol Rooi ku dos wega . Den e sekshon Femenino Watakeli lo enfrentá Xaverianen den un wega ku Xaverianen lo bai tin kos di regla i den e sekshon Maskulino  Stakamahakchi lo enfrentá Xaverianen. A pone brantwer na alerta pa e wega nan di awe nochi paso e temporada di Vòlibòl aki ta keda kayente !