Enkuentro ku a tuma lugá den Stadion Ergilio…. Hato Jong Holland ta gana di Centro Dominguito ku skor di 1-0

154
Akshon di e enkuentro ayera nochi entre Centro Dominguito i Jong Holland.
BRIEVENGAT – E di tres fecha pa loke ta e promé buèlta di e kampionato lokal di futbòl su promé divishon a start ayera ku e enkuentro entre e ekipo Centro Dominguito i e ekipo Jong Holland. E enkuentro aki a tuma lugá den stadion Ergilio Hato na SDK i a ser dirigí pa e árbitro di aña di e temporada tras di lomba ku ta Arthur Gosepa.

E enkuentro ta ranka sali ku e ekipo di Centro Dominguito tratando na soprende for di den trempan di e enkuentro pero un defensa hermetiko di e ekipo trikolor ta wanta nan gol limpi. Seguidamente e ekipo di Jong Holland ta bai mas den atake i ta krea un kantidat di oportunidat pero no ta asertá pa logra anotá e gol pa habri e markadó.

E enkuentro ta kontinua ku ambos ekipo basta eratiko i e wega ta yega sosiegu empata 0-0. E di dos mitar ta start ku ambos ekipo un biaha mas tratando na habri e markado for di trempan di e di dos tempu pero no ta logra.

Jurensley Martina aki ta skòp un bala ku pia robes riba e gol defendé pa Gino Costina.

E ekipo di Jong Holland tabata esun ku mas ta domina e bala mientras e ekipo di Centro tratando pa forma algun kontra golpi. Tabata na di 75 minut ku Dwaylon Maria ta risibi un bon kruse for di riba ala robes di Jurensley ‘Enchi’ Martina i e ta djis skuif esaki den e gol defende pa Gino Costina i di e forma aki e ekipo Trikolor ta bai ariba 1-0.

E enkuentro ta kontinuá ku e ekipo di Jong Holland muchu mas peligroso i buskando pa amplia e skor, pero Centro Domiguito ta defendé ku alma i kurpa. Den tempu adishonal e hungadó Calvenhoven ta risibí su di dos karchi hel di e enkuentro i mester a bandoná e tereno di wega lagando Centro ku un hungadó ménos i seguidamente e enkuentro ta bin finalisá ku un viktoria pa Jong Holland.

Ku e viktoria aki Jong Holland ta akumula un total di 7 punto (na prome luga) den 3 wega mientras ku e ekipo di Centro Dominguito ku e derota ta keda ku apenas 1 punto den tres enkuentro.