Fedakor a start ku su kampionato di DAM individual

102
FEDAKOR a start ku su kampionato di DAM individual 2019.
WILLEMSTAD – Despues di a organisá un tremendo kampionato mundial di DAM aki na Kòrsou, e ‘COC WORLD CUP 2019’ durante dianan 11 pa 17 di novèmber último, FEDAKOR no a drumi i ta kontinuá ku su aktividatnan lokal manera kustumber.

Tabata djaluna 25 di novèmber ku e kampionato Senior Nashonal Individual Kòrsou 2019 a ranka sali ku un total di 19 kompetidor. Fedakor ta sumamente orguyoso di por anunsiá ku e kantidat di partisipantenan a oumentá i esaki ta nifiká ku por bin basta sorpresa durante di e kampionato nashonal aki.

E kampionato aki lo konosé e sistema di ‘round-robin’ unda tur kompetidor lo kompetí kontra di otro, pues lo tin un total di 19 buèlta. E próksimo fecha programá ta dia 01 di desèmber próksimo pa 7or anochi aya na  Kas di Dam Kòrsou, ora ku nos lo haña e di 3 fecha di e kampionato ku lo dura te ku dia 19 di yanüari próksimo.

Pues tur e enkuentronan ta tumando lugá aya na Kas di dam Kòrsou “Pensa i Hunga” ku ta situa den Galeria St. Maria na F.D. Rooseveltweg #52 Unit N. Un i tur ta mas ku bon biní pa sigui e weganan aki gratis.