Kòrsou ta kla pa e di 7 edishon ‘Schotborg Cup’ di Biar

109
E selekshon di Kòrsou ku na 2018 a gana e di 6 edishon di e ‘Schotborg Cup’ aya na Boneiru.
WILLEMSTAD – Federashon Biar Kòrsou ta ekstendé un invitashon na tur amante di deporte pa bin presensia e di 7 edishon di Schotborgh Cup ,un evento entre e selekshonnan di Boneiru i Kòrsou.

Mañan djabièrnè 29 di novèmber pa 8’or di anochi lo inisiá ku e di 7 edishon Schotborgh Cup. Aña pasa tabata e selekshon di Kòrsou ku a gana e torneo aki aya na hermana isla Boneiru i na e okashon ei e selekshon tabata formá pa Jeffrey Nieuwenhuyzen, Sybren Boekhoudt, Gemayel Rol, Shandro Paula i tambe Michael Arvelo, bou di direkshon di kapitan Hugo Limon.

Mester remarká ku na e momentunan aki e seri ta empatá na 3 viktoria pa banda. E ekipo di Kòrsou sigur ta bon prepará pa e torneo aki pero mester agregá si ku e selekshon di Boneiru no ta baha kabes pa esun di Kòrsou.

Pues lo ta hopi interesante pa bin presensia kua di e islanan lo bai ku e viktoria durante e fin di siman aki. E weganan ta kontinuá djasabra i djadumingu pa 2’or di mèrdia na Landhuis Granbeeuw.

Tur amante di deporte i di biar en partikular ta mas ku bon biní pa presensia i apoya e hungadonan.