Pastor dominikano kondená pa agreshon seksual kontra menor di edat

148
Durante vários añanan a abusá di viktima.

SANTO DOMINGO – Un tribunal dominikano a kondená un pastor na dies aña di prizòn. Ta trata aki di e pastor identifiká komo Miguel Florenzan Ulloa pa kometé diferente agreshonnan seksual kontra un menor di edat.
E agreshonnan seksual a inisiá na momentu ku e viktima tabatin 11 aña di edat i a keda prolongá durante serka di seis aña, miéntras e hóben tabata hasi su estudionan na e Kolegio Agustiniano de La Vega, provinsia na nort di Repúblika Dominikana, unda e pastor tabata direktor.
E presidente di e Segundo Tribunal Kolegiado di La Vega, Lucrecia Rodriguez, kende a lesa e sentensia, a splika ku korte a kita un kastigu mas grave a motibu ku no por a demostrá kaso di violashon òf ku a kousa leshonnan na e viktima, Victor Rafael Manon, awor mayor di edat.
E wes a hasi un relato ekstenso di agreshonnan seksual, meskos ku e viktima mes a resaltá, i a sigurá ku e pastor a abusá seksualmente di dje na diferente okashon den ofisinanan di e skol i un kamber.
Sinembargo, tabata pa falta di prueba, ku e tribunal a kita e kastigu di violashon, meskos ku otro alegashonnan presentá pa falta di prueba.
E fiskalia, ku a pidi inisialmente 20 aña di prizòn, a alegá ku e pastor tabata saka e hóben for di bibienda di su mama, kontra su boluntat i tabata suministrá remedinan na su persona.
Ademas di e kondena di prizòn, a imponé tambe un indemnisashon di 15 mion di peso na e viktima.
E skol tambe a keda kondená na pago di un indemnisashon di 5 mion di peso pa nan responsabilidat den e kaso di abusunan aki.