Salim Kuzi ta titulá kampion di e disiplina ‘straightpool’

100
Salim Kuzi kampion straightpool huntu ku sup kampion Jeffrey Nieuwenhuyzen.
WILLEMSTAD – Federashon Biar Kòrsou a sigui ku su aktividat mensual individual kual e biaha aki a toka turno na e disiplina di ‘straightpool’.

Djasabra i djadumingu último 21 miembro di Febiko a partisipá den e evento aki ku ta patrosiná pa Montana Bierhuis i House of Billiard Play. Den buèlta di ganadó, den kuart final, Jeffrey Nieuwenhuyzen ta gana Salim Kuzi 75 pa 65 i den e otro enkuentro Sybren Boekhoudt ta gana Hugo Limon 75 pa 52.

Den semi final Jeffrey, den un wega ku a kana hopi pèrtá, ta logra gana di Sybren 75 pa 73 i asina pasa pa final. Den buèlta di pèrdèdó ,Hugo Limon ta gana Michael Arvelo 75 pa 69 i Salim Kuzi ta gana Jimmy Rol 75 pa 68. Salim Kuzi a sigui riba e bon kaminda i ta gana Hugo Limon i despues Sybren Boekhoudt pa asina yega e gran final.

Den un tremendo partido final Salim ta sali viktorioso ganando Jeffrey 75 pa 68. Na puesto 5 a keda empatá Michael Arvelo i Jimmy Rol, Hugo Limon a finalisa na puesto 4, miéntras ku Sybren Boekhoudt a finalisa na puesto 3. E kampion a resulta Salim Kuzi, miéntras ku Jeffrey Nieuwenhuyzen a keda komo sup kampion di ‘straightpool’.