SVB ta gasta un averahe di 36 mil florin pa kada pashènt ku ser manda eksterior

Pa aña komo 36 mion florin ta bai na esaki so:

1223
Phillip Martis: Komo direktor di SVB e ta keda konfrontá ku situashonnan difísil ya ku ta hopi sèn ta sali pa manda pashèntnan afó. Ku yegada di CMC e ta konvensí ku e gastunan aki lo baha drástikamente.
WILLEMSTAD—Ku si e peso riba e fondonan di SVB ta haltu ta sigur un realidat. Manera ta konosí anualmente tin un kantidat di pashènt ku ta bai risibí tratamentu pa nan malesa òf kuido mas avansá den eksterior. E paisnan ku mas nan ta bai Costa Rica, Colombia i Hulanda. Ta resultá ku pa aña SVB ta saka komo 36 mion florin pa manda e pashèntnan aki den eksterior.

Vigilante a hiba kombersashon ku direktor di SVB tokante dje partikularidat aki. Philip Martis a rekonosé ku mayoria dje pashèntnan ta bai na e paisnan ku nos a menshoná, esta Costa Rica, Colombia i Hulanda. Den e kombersashon e la mustra Vigilante ku pa aña ta bai  komo 1000 pashènt ku ta representá un gastu di 36 mion florin. Esaki ta nifiká ku kada pashènt ku a bai afó a kosta SVB un averahe di36 mil florin. Ku yegada di CMC nan ta spera di kòrta formalmente den e gastu aki i perkurá pa e sènnan keda Kòrsou. E plannan ku tin riba mesa ta pa kòrta na 500 e kantidat di pashèntnan ku ta ser manda anualmente eksterior. Ku e medida aki SVB ta spera di spar 19 mion florin ku ta bai pa paga pa e servisionan den eksterior. Den e entrevista Phillip Martis a indiká na Vigilante ku loke nan a kalkulá ta ku yegada di CMC por redusí e huida di divisa aki formalmente. Ta asina ku pa lokual ta trata konstrukshon di CMC e gastunan pa kamber lo mester a hasi e tarifa pa keda aden mas karu, segun loke ku minister Kenneth Gijsbertha a deklará na nos anteriormente. Den e mesun rosea e la yega di mustra Vigilante pa por a tene e tarifanan na e mesun ku a bin ta paga na SEHOS ku su kolega minister Suzy Romer a keda di hasi ahustenan den e pòst di GMN. Den e kuadro aki ta bin entre otro e panorama pa baha e gastunan di manda pashènt afó ku 19 mion florin. Phillip Martis ta konvensí ku lo baha esaki drástikamente, paso na CMC mes lo duna sierto servisionan. Entre otro el a mustra Vigilante riba e echo ku mamanan ku tin di duna lus prematuro i ku tin di ta den kuido intensivo lo no mester bai afó mas pa risibí kuido, paso por akapará nan na CMC.•