Turista ta  bin fayesé na Sta Cruz

Ora nan a bai sambuya den Blue Room

519
Willemstad—Djaweps 28 di novèmber 2019, alrededor di 13.54’or Sentral di Polis a risibí notifikashon di un kaso di hogamentu ku a tuma lugá den Blue Room den área di playa Sta. Cruz.

For di un investigashon ku polis a hasi a resultá ku un grupo di turista a bai bishitá e kueba den laman ku yama Blue Room. Na momentu ku e grupo di turista a sali for di Blue Room nan a nota ku kasá di un di e damanan no a regresá huntu ku e grupo.Algun persona huntu ku e guia a bolbe bai den e kueba i topa ku e hòmber for di konosementu riba un pida baranka. Nan a logra saka e hòmber aki for di e sitio, hink’é den boto i bai playa Sta. Cruz kuné.

Personal di ambulans ku tabata na e sitio a purba na reanimá e hòmber aki pero sin e resultado deseá.Dòkter di polis a konstatá morto di e hòmber turista di Texas.Manera ta kustumber na momentu di fayesimentu di un estranhero, ta despues ku pone famianan ofisialmente na altura por publiká nòmber di e víktima.Riba òrdu di Ministerio Públiko a konfiská e kurpa sin bida pa mas investigashon. Di parti di vigilante ta bai palabranan di kondolensia na famia di e defuntu ku pèrdida di nan ser kerí.