Aksidente ta laga saldo di 7 morto atras na Perú

156
Forma ku e bùs a keda despues di kai den abismo.

LIMA – E kaida di un bùs den un abismo na parti sùit di Pero, a laga saldo di shete morto, entre nan tres menor di edat. Esaki ademas di un desena di personanan heridá.
E bùs tabata move for di e siudat di Puno ku alrededor di 44 persona abordo. Esaki aparentemente ku direkshon Cusco i aki a sufri un aksidente pa un ekseso di velosidat.
Segun GPS di e vehíkulo, esaki tabata move ku un velosidat di 81 kilometer pa ora promé ku el a aksidentá. Esaki miéntras ku e velosidat máksimo na e zona ta di 35 kilometer pa ora.
Na momentu ku a informá di e aksidente, kua a keda registrá na kilometer 1001 di e karetera Panamerikano Cusco-Puno, mesora a aktivá protokòl di atenshon i a presentá pa ousiliá i trasladá esnan heridá pa e sentro médikonan den serkania.
Di su banda e bosero polisial a indiká na medionan di komunikashon ku esnan heridá a keda evakuá i transportá pa klínika i sentronan médiko di e siudat di Cusco, na masoménos 1000 kilometer di Lima.
Mas aleu a indiká tambe ku 15 di esnan heridá ta alumnonan di skol di e region di Puno, kendenan tabata dirigí nan mes pa Cusco pa selebrá un biahe di promoshon eskolar.
Perú ta registrá kada aña di nobo alrededor di 3 mil persona ku ta pèrdè nan bida den aksidentenan di tráfiko, mayoria di nan despues di keda alkansá pa vehíkulo i 55 mil herido.