Den vòlibòl klase superior femenino…. Watakeli ku viktoria kontundente 3-0 riba Xaverianen

195
Akshon den e sekshon femenino di e enkuentro entre Watakeli i Xaverianen.
BRIEVENGAT – E kampionato di Vòlibòl kategoria superior a kontinuá djarason nochi den sala Errol Rooi ku dos enkuentro den klase superior i mas abou por tuma knota di un resumen di e resultadodi ambos.

Den klase femenino Watakeli a propiná Xaverianen un derota kontundente di 3-0, ta tin hopi espektativa pa e wega aki komo ku un di e piesanan estelar di Xaverianen a bini kas bèk, pero Watakeli tambe a hasi su tarea i a bin ku un plan di wega ku no a duna Xaverianen niun espasio pa bira un menasa grandi. Pues di forma konvinsente nan ta gana ku skor di 3-0 ku e parsial nan 25-9, 25-21 i 25-20. Por mira kla si kon serka Xaverianen tabata den e dos último sètnan.

Akshon den e sekshon maskulino di e enkuentro entre Xaverianen i Stakamahakchi.

Den e sekshon Maskulino, Xaverianen a pasa riba Stakamahakchi ku relativo fasilidat. E wega aki tambe a kaba den 3 sèt ku parsialnan 25-22, 25-18 i 25-21. Stakamahachi ta uzando gran parti di su ala hubenil den klase superior, dunando e hóben prospekto nan aki mas tempu di wega, mirando ku próksimamente hopi di e hóbennan aki lo bai representá Kòrsou den Cazova su kampionato U21.

E kampionato ta kontinuá djadumingu awor ku un kalendario kompletu den Sala Errol Rooi kuminsando for di 5’or atardi. Pues bin sostené bo ekipo di vòli faborito i disfruta di bon enkuentro di vòlibòl.