Empresaria asesiná pa òrdu di su propio yu di kriansa

236
Yu di kriansa di e víktima, kende aparentemente ta esun responsabel pa su morto.

SAN JUAN – E investigashon polisial relashoná ku e asesinato di e empresaria Hilda Padilla Romero, ta mustra un drama di intriga familiar ya ku e yu di kriansa di e viktima, identifiká komo Keisha Perez Biggio, a resultá di ta esun ku a ordená e krímen.
Segun investigashonnan hasí i kargonan radika pa e Tribunal di Bayamon, Perez Biggio lo a kontratá Luis Gonzales Martinez i William Aviles pa kaba ku bida di Padilla Romero.
E empresaria a keda tirá dia 30 di sèptèmber último, miéntras e tabata manehá riba e karetera PR-177 di Guaynabo, konosí komo Los Filtros, ku su yunan den outo. Padilla a fayesé despues di risibí vários impakto di bala na altura di su kabes i brasa na banda robes.
E dos yu muhénan di Padilla Romero, di 18 i 8 aña di edat, a resultá ileso for di e atake aki.
E viktima tabata kasá ku tata biológiko di Perez Biggio, Jose Perez Romero, kende ta doño di un kompania sumamente eksitoso di konstrukshon. Padilla Romero tabata esun ku ta atministrá finansa di e kompania.
Segun tur kos ta indiká, e hóben a kontratá e hòmbernan ariba menshoná pa pone fin na bida di Hilda pa motibu di un problema familiar.
Di otro banda, segun abogado di Perez Biggio, Gonzales Martinez a konfesá ku el a asesiná e empresaria i su testimonio di gran parti ta prueba ku a keda presentá kontra di su kliente. Sinembargo, el a intentá di sembra duda relashoná ku kredibilidat di e vershon aki.
E abogado inkluso a hasi referensia na e echo ku Gonzales Martinez a keda detené na inisio di luna di novèmber pa otro kaso di violashon di lei di arma pero ku e kaso no a prosperá. E intervenshon aki ta loke ku a pone ku outoridatnan a yega na e konklushon, pues e tabata e mesun arma ku aparentemente a kita bida di e viktima.
Un wes di su banda a fiha un fiansa di 6.4 mion di dòler pa Perez Biggio, 5.8 mion dòler pa Aviles i 1.3 mion di dòler pa Gonzales MArtinez.