Resultado segundo divishon djárason i djaweps: Sithoc ku Willemstad i Tera Kòrá ta gana

228
Resultado di dos divishon
WILLEMSTAD – Stadion Antoine Maduro tabata senario djárason último pa dos enkuentro bálido pa e kampionato lokal di futbòl su di dos divishon. Miéntras ku ayera djaweps e ekipo di Tera Kòrá a enfrenta C.H. Mauhuma.

Primeramente tabata e ekipo di Sithoc ku e enfrentá e ekipo Deportivo Santa Rosa i tabata e ekipo di Sithoc ku ta logra un viktoria ku skor di 2-0. E golnan a keda anotá pa Alden Merrite na di 35 minüt i David Hyder na di 70 minüt. Seguidamente tabata e ekiponan di Willemstad i esun di Indekor ku a enfrentá otro.

Den e enkuentro aki tabata e ekipo di Willemstad ku tambe ta sa di gana di su rival Indekor ku skor di 2-0. Ámbos gol di e ekipo Willemstad a keda anotá pa e hungado Emian Johar Semedo. Tabata na minüt 8 ku e ta skor e promé gol pa Willemstad i na di 75 minüt di e enkuentro e ta seya e viktoria ku su di dos gol di e enkuentro.

E kampionato a kontinuá ayera djaweps den SDK, pa mitar di ocho anochi , ku e enkuentro entre e ekipo di Tera Kora i e ekipo di Mahuma. Tabata e ekipo di Tera Kòrá ku ta sali di porta grandi ku un viktoria konvinsente ku skor di 3-0 riba e ekipo di Mahuma ku ta pasando un mal racha te ku awor. E hungadó Rodien Luciana a skor na dos okashon (‘3 i ‘64) mientras ku Brandon Ricardo a kaba di seya e viktoria na di 75 minut.