Dil Ulandes a kondusí na morto di Helmin Wiels (part V)

4616
Lek: Vigilante a publiká fo’i inisio ku un lèk den RST a kondusí na morto di Wiels. Sigui lesa e seri di artíkulonan publiká e dianan aki den Vigilante.
Punda—Esaki ta e di sinku artíkulo den un seri eksklusivo ku Vigilante ta publiká riba asesinato di Helmin Wiels. Ministerio Públiko a tene pa hopi aña sekreto, kòmbersashonnan ku Wiels a hiba ku RST (lesa hustisia ulandes). Helmin Wiels a papia ku un hòmber ku yama Eric Kok. Pa komprondé kiko Wiels a papia ku Kok, mester bai bek 1 aña,  promé ku e fecha di 5 di mei 2013, e dia Wiels a fayesé. E enkuentro ku Wiels a hiba ku Eric Kok di RST,  no a keda sekretu, el a bin lèk.

E kòmbersashonnan ku Helmin Wiels a hiba ku Eric Kok, no tabatin mal intenshon, pero a bin resultá malu despues pa e eks lider di Pueblo Soberano. E dos hòmbernan a papia prinsipalmente riba e posishon di Kok, despues ku e baha komo teamchef interino na RST. Fiskal mr. Gert Rip den korte na yüni 2019, a konfirmá ku Kok i Wiels a hiba kombersashon. Un otro ulandes ku yama Wim van Vemde, mester a remplasá Kok na mei 2013 i ya kaba van Vemde tabata trahando den ofisina na Zeelandia, preparando su mes. Huntu ku van Vemde i Kok, tabatin e hóben yu di Kòrsou, alto hefe den kuerpo, Jules Ilario. Ilario tabata e “counterpart” yu di Kòrsou den RST. Ilario aparte di tabata polis, tabata músiko tambe. Komo músiko e la siña konosé Jorge Jamaloodin, kende tabatin e sentro nokturno “Studio”, na Saliña. Van Vemde, Ilario i Kok, tabata deliberá diariamente riba maneho hudisial investigativo na Kòrsou den nan ofisina na Zeelandia. E tres nòmbernan aki, tabata esnan kende a tambe a inisiá e investigashon riba asesinato di Helmin Wiels. E morto di Wiels a kai despues ku Eric Kok a logra kombensé Helmin Wiels di lobi p’e por haña un un posishon komo konsehero hurídiko pa minister di hustisia Nelson Navarro. Jules Ilario, durante investigashon di Magnus riba morto di Wiels, a bandoná RST. E la uza komo argumento di e.o. su posishon hurídiko i motibunan “organisatorio”. Miéntras van Wim Vemde tabata na Kòrsou preparando pa tuma maneho di RST, Eric Kok tabata papiando ku Helmin Wiels den e stashon di radio na Caracacasbaaiweg. E kòmbersashonnan a bin resultá funesto pa Wiels, sin nunka e dos hòmbernan por a pensa riba esaki. Kok i Wiels no por a skohe un periodo mas malu pa nan por regla un posishon pa e ulandes oropeo por a keda Kòrsou despues di su periodo na RST traspasá. Pa tal motibu, manera publiká den e artíkulonan anterior, 28 yanüari 2012 ta e fecha mas importante den investigashon riba e morto di Wiels.

Pa por komprondé e embergadura di e kòmbersashonnan entre Wiels i Kok, mester bai bek den e veredikto di Jorge Jamaloodin i lesa kon deklarashon di un testigu anónimo “B5” a premirá morto di Wiels. Esaki pasobra B5 no ta un testigu fantasma di Ministerio Públiko, sino un persona ku konosé defuntu Pretu Florentina hopi di aserka. B5 mesora a pone e relashon entre e robonan di oro i oloshi hòrtá ku e morto di Helmin Wiels. Wes Lieshout, kende a kondena Jorge Jamaloodin na 28 aña di kastigu pa tabata kómplise den morto di Wiels, tambe a mira e relashon entre bara di oro i oloshi hòrtá. Lieshout  a bisa ku e deklarashon di B5, esta ku Jorge tabata tras di e asesinato, por wòrdu probá mirando e detayenan ku e tabatin di hinter e suseso. Testigu B5 a deklará ku Pretu Florentina tabata tras di e atrako di e barku Summer Bliss, unda a bai ku 11 mion dòler na oro for di e barku. E testigu aki lo a deklará ku ta Jorge Jamaloodin lo mester a paga pa e asesinato tambe. Tambe el a bisa ku Nini Fonseca lo tabata e intermediario entre Pretu Florentina ku Jorge mirando ku nan mes no tabata papia ku otro. Segun e testigu ku kada bes e tabata tende nan papia di  ‘e hòmber’ pero e no tabata sa ta ken primeramente. El a splika mas aleu ku nunka e no a benta nòmber di Robbie Dos Santos, pero nòmber di Jorge si el a tende. Tambe el a bisa ku Pretu lo tabata debe Jorge 100 mil florin, mirando ku e no tabatin plaka pa paga esnan ku a tira e atrako riba e barku.

Miéntras B5 a pone un relashon ku Pretu Florentina den robo di bara di oro, fiskal Gert Rip a kombensé korte ku defuntu Pretu Florentina a organisá e robonan di oloshi 28 di yanüari 2012 na Aruba i 2 di yüni 2012 na Kòrsou. Mientras RST i VDC (Servisio di Inteligensha Korsou) tabata risibi tip di posibel envolvimentu di Jamaloodin ku Fonseca i Florentina den kompra di oro i oloshi hòrtá, Helmin Wiels tabata organisando su atake polítiko riba MFK dor di 1. Ataka Loteria SMS di Robbie Dos Santos públikamente i 2. Papia ku Eric Kok di RST den sekreto.  (lo kontinuá)