Skèrpènè a habraká UnDeBa 8-0…. No ta Lionel Messi sino Jonathan Font ku ‘hat-trick’ ayera

1901
No ta Lionel Messi sino Jonathan Font ku a debuta ayera ku‘hat-trick’.
WILLEMSTAD – Kampionato di futbòl lokal su promé divishon a kontinuá ayera den stadion Dr. Antoine Maduro ku e enkuentro entre e ekipo di Scherpenheuvel i e ekipo di UnDeBa. Tabata Juniel ‘Araña’ Adelina ku tabatin e parti di arbitrahe na su enkargo den un enkuentro ku e ekipo di Skèrpènè a duna e ekipo di UnDeBa un halá di sota ku skor di 8-0.

E enkuentro ta start ku e ekipo di Scherpenheuvel atakando for di den e promé sekònde di wega i despues di 36 sekònde ya e promé gol ta keda anotá pa e debutante di e ekipo Skèrpènè, Jonathan Font, un di e tres argentinonan ku a reforsá e ekipo resientemente i di e forma aki Skèrpènè ta pika dilanti 1-0.

E trio argentino, Ciarniello, Font i Sebastian Robles ku a debutá ayera nochi.

E ekipo di Skèrpènè ta sigui ataka i tabata na di 4 minüt ku un biaha mas e argentino, no Messi sino, Jonathan Font, ku ta amplia e bentaha ku skor di 2-0. UnDeBa ta lusi totalmente pèrdí riba tereno di wega i na di 24 minüt un biaha mas tabata Jonathan Font (hat-trick) ku ta bora e nèt i ta amplia e bentaha 3-0 na fabor di Skèrpènè.

E enkuentro ta sigui riba e mesun ritmo i na di 43 minüt Christopher ‘Papa’ Isenia ta avansá bon riba ala robes i ta krusa e bala pa e otro argentino, Maximiliano Ciarniello, ku no ta duda i ta los un disparo dirèkt riba gol i e skor ta bira 4-0 pa Skèrpènè.

E kos no ta keda asina i na di 45 minüt, nèt algu promé ku sosiegu, e argentino Maximiliano Ciarniello ta bolbe anotá i e skor ta bira 5-0 i e enkuentro ta sosegá ku skor abulta na fabor di Skèrpènè.

E di dos mitar ta kuminsá ku e ekipo di Skèrpènè mesun skèrpi miéntras ku e ekipo di UnDeBa tabata trata na defendé ku alma i kurpa. Segun e wega tabata avansá e ekipo di UnDeBa a mustra señal di ta na bida i ta monta algun atake pero sin muchu konsekuensia peligroso pa e gol di Skèrpènè.

Momentu ku Benjamin Gil Guedez ta anotá e di 6 gol pa Skèrpènè.

Den e parti final di e wega Skèrpènè ta bolbe kambia su ritmo i despues di algun kambio ta anotá no ménos ku 3 gol den ménos ku 5 minüt di wega. Tabata na di 87 minüt Benjamin Gil Guedez ta probechá di un fayo di UnDeBa i ta avansá ku e bala i ta skor e di 6 gol di su ekipo.

Seguidamente na 89 tabata Jeremy Overman ku tambe ta probechá di otro fayo i ta skor e di 7 gol mientras ku Benjamin Gil Guedez, na minüt 90+, ta seya e fiesta di gol anotando e di 8 gol, su di dos di anochi, pa e ekipo di Skèrpènè i e enkuentro ta bin finalisá ku e skor abultá di 8-0 na fabor di Skèrpènè.

E kuarteto anotadó (Jonathan Font3X, Maximiliano Ciarniello2x, Jeremy Overman1x i Benjamin Gil Guedez2x) pa e ekipo di Skèrpènè ayera.

Ku e viktoria aki e ekipo di Skèrpènè ta pasa pa komandá e tabla di posishon bèk ku un total di 7 punto den 3 enkuentro realisá te awor ku 11 gol na fabor i 1 gon kontra.