Intento pa kibra mashin di plaka na Marchena

538
Willemstad—– Polis i tambe e personal  di seguridat di Banko Maduro a keda dirigí pa e mashin di plaka na Marchena situá na e kura di Marchena Hardware den Marchena  pa un intento di ladronisia.

Den oranan di mainta tantu Polis komo e personal di seguridat a keda dirigí pa e bankomátiko di Maduro & Curiels Bank na Schottegatweg West pa un intento di ladronisia. Ta trata di e bankomátiko ku tin situá na e kura di Marchena Hardware na Marchena. Na e sitio a bin tuma nota ku a spùit e kámaranan pafó i tambe esnan na e mashin di plaka pa asina evitá ku por a kapta imáhen di esnan ku tabata trata di kibra e mashin di plaka. Tambe a tuma nota ku a traha un buraku na e parti padilanti di e mashin usando un bormashin. Sigur aki tabata kier traha un buraku pa asina por a hinka e slan di gas den e mashin pa eksplotá esaki pa trata di yega na e plaka nan den e mashin. No ta konosí pa Vigilante kiko tabata e motibu ku a pone kue  malechornan a bandoná e sitio. Polis ku e personal di seguridat a presentá na e sitio i a tuma nota di e destrukshon kometé na e bankomátiko i a opta pa sera e mashin di plaka pa asina por a kaba di hasi e demas investigashon. Den pasado ta netamente den desèmber a kuminsá ku  promé intento pa rementá mashin di plaka pa por yega na e botin den esakinan. Esei ta e motibu ku outoridatnan ta bon na altura i tambe  tin bon atenshon pa e práktikanan den fin di aña aki.