Kompania ulandes ta haña eksklusividat di kompra na hospital nobo

1731
Menshoná: e titular di Salubridat Públiko, Camelia Romer no a menshoná Coppa públikamente ainda.
Otrobanda—E kompania ulandes Coppa, ubiká na Arnhem Ulanda, a risibí eksklusividat pa atendé tur kompra na Curacao Medical Center. Esaki ta lokual Gilbert Martina a konfirmá na Vigilante splikando ku Coppa ta konosí pa nan i ta yudando CMC ku e departamento di kompra.
Asistensha: segun Martina, Coppa lo yuda skapa gastu na CMC

Segun Martina, e servisionan firmá ku Coppa ta inkluí hinter  e trayekto di “inkoop”, esta kompra en general.”Nan ta yuda CMC ku e trayekto di “inkoop” di tur material, “consumables” i remedi. Alabes nan ta konsehá riba redukshon di gastunan nesesario pa por realisá e presupuesto di 2020 na CMC”. Segun e splikashon di Martina, e kompania Coppa ta e organisashon enkargá pa atendé i planifiká tur lokual CMC kumpra na remedi, material i demas konsumo kual ta inkluí p.e. produktonan sanitario, kuminda, bebida ets. E desishon di CMC, ta destiná pa skapa desishonnan inefisiente i inefektivo ku a kosta Sehos miónes den pasado. Coppa ta un kompania spesialisá den e proseso di kompra. Nan por manehá kompra interino, konseho riba kompra di produktonan i servisio, independisashon di un departamento di kompra i ta proponé solushon pa un proseso di kompra mas efisiente.  Pero e desishon pa atkishon di Coppa, no a wòrdu trata públikamente, miéntras no tabatin un destaho públiko pa esaki. Pa tal motibu, un grupo di kompania lokal no a keda muchu kontentu, lokual alabes a kondusí na kasonan den korte kontra di Sehos.

Segun Martina su splikashon kòrtiko, e desishon ta unu pa yuda ministerio di salubridat públiko skapa gastunan den e sektor/kartera. Manera ta konosí, den kuadro di pakete di medida pa trese Kòrsou den ekilibrio finansiero, minister Camelia Romer a anunsiá di tei skapa 84 mion florin anual. Segun Camelia Römer konsientemente el a opta pa no mishi ku prima si seguro sosial, pero pa skùif den gastunan operashonal. Manera ta konosí, un prekalkulashon ta indikando un diskrepansha den gastunan operashonal di SEHOS pa HNO na alrededor di 60 mion florin. E kalkulo aki tambe lo a bin dilanti den e aktual rapòrt ku e.o. Reginald Carolina a laga traha. Camelia Römer a duna indikashon den kual direkshon e ta bai pa skapa 84 mion. E promé liña ta ahuste den pagonan na spesialista. Aparte di mishi ku tarifa, e edat pro medio pa keda den funshon tambe tei kambia. Ehekushon lo skapa 17 mion florin anual. Na di dos lugá, segun hùiswèrk di e grupo di konsehero di Camelia Römer, den ekspedishon médiko pa eksterior por skapa. HNO, na momento e ta den operashon, por hasi hopi prosedura médiko ku no mester manda hende den eksterior pa hasi. Ehekushon lo skapa 19 mion florin anual. E di tres pia di strategia pa baha gastu di Camelia Römer ta riba tereno di remedi. Akinan e kompania Coppa tei hunga un rol hopi grandi. Ehekushon di e tres strategia tei skapa 34 mion florin. Segun e minister tei apliká mesun sistema na Aruba unda tei vigilá e komportashon (pre)-preskripshon di remedi. Finalmente tei trata na eliminá mas tantu posibel, diagnósis dòbel entre otro serka spesialista. Segun e minister e kambionan lo skapa 84 mion florin anual den su kartera. Esei ta nifiká ku Camelia Römer sin mester hisa tarifa por kontribuí marginalmente den un entrada adishonal di kasi 24 mion florin, saliendo fo’i punto di bista ku ya tin destinashon pa e 60 mion florin saneá.  E desishon di Camelia Romer pa inkorporá Coppa a pone algun kompania “on hold”. Entre nan ta konta, Vellux International i Medicare Curacao n.v. tantu Vellux komo Medicare a start proseduranan sivil den korte pa un suma kolektivo di riba 1.2 mion florin.