Rhuggenaath ta atmití ku beslag por kai “anytime” riba krudo venezolano

1451
Konsiente: promé minister di Kòrsou, Rhuggenaath ta konsiente ku petroli venezolano den tankinan di Isla por impliká konsekuenshanan hurídiko.
Punda—Promé minister di Kòrsou, Eugene Rhuggenaath ta di akuerdo ku no tin kòntròl riba  e proseso di beslag, unabes krudo venezolano drenta haf di Kòrsou. Esaki el a duna di konosé den un reakshon na redakshon di Vigilante, djadumingu último.

Pa por trese krudo Kòrsou tin básikamente dos problema. Unu ta Estádos Unídos i dos ta e debenan bionario di PDVSA rònt mundu ku tin kréditornan koriendo nan tras den tur tribunal internashonal. Segun Rhuggenaath pa lokual ta trata e blokeo estado unidense riba Venezuela no ta problema. E lisensia nobo ku Kòrsou a optené di OFAC ta duna posibilidat pa trese krudo for di Venezuela bou di kondishon ku ta na benefisio lokal. Esaki  pa fasilitá pago di debenan lokal i suministro di kombustibel. Segun Rhuggenaath mester verifiká esaki ku OFAC.

E di dos problema ta unu mas serio. Segun Rhuggenaath e debenan internashonal  ta keda un faktor determinante.  Manera relata den Vigilante, korte sivil den Punda ta birando un tribunal inernashonal pa kompanianan internashonal kleim PDVSA i Estado Venezolano. Presensha di krudo venezolano riba teritorio di Kòrsou ta sigui un problema. E siman aki mes tin un kompania estado unidense, Huntington Ingalls ta sigui ku un proseso di kasi 128 mion dòler kontra di Venezuela den korte na Willemstad.

Internashonalmente ta kalkulá ku PDVSA i Venezuela den konhunto tin un total di 190 bion dòler na debe. 76 bion ta debenan no-finansiero okashoná pa desishon di nashonalisá kompanianan internashonal bou di régimen di Chavez (16 bion) i debenan na kréditornan (57 bion). 115 bion dòler ta debenan den bolsa finansiero for di kual interesnan retrasá riba pagonan, inkluso 36 bion riba obligashon via bono emití pa nan gobièrnu. Ademas PDVSA tambe tin 28 bion dòler retrasá den kanselashon di bono. Mayoria di e kréditornan aki ainda mester kuminsá tuma akshon kontra di Venezuela. Pa tal motibu un desishon di Korte di Apelashon manera den e.o. den kaso di Huntington ta delikado, mirando e posibilidat pa Willemstad no bira e trampolin di apelashonnan faborabel pa kréditornan venezolano. Un posishon ku por impliká konsekuenshanan polítiko, pero tambe pa kontinuidat di PDVSA na Kòrsou.