Dil Ulandes a kondusí na morto di Helmin Wiels (part VI)

2959
Punda- Esaki ta e di seis artíkulo den un seri eksklusivo ku Vigilante ta publiká riba asesinato di Helmin Wiels. Ministerio Públiko a tene pa hopi aña sekreto, kòmbersashonnan ku Wiels a hiba ku RST (lesa hustisia ulandes). Helmin Wiels a papia ku un hòmber ku yama Eric Kok. Pa komprondé kiko Wiels a papia ku Kok, mester bai bek 1 aña,  promé ku e fecha di 5 di mei 2013, e dia Wiels a fayesé. E enkuentro ku Wiels a hiba ku Eric Kok di RST,  no a keda sekretu, el a bin lèk.

A keda konfirmá pa Kade Wilsoe, rumannan di Helmin Wiels, Fiskal Gert Rip den korte durante tratamentu kasonan di Jorge Jamaloodin na yüni 2019, ku Helmin Wiels a hiba kombersashon ku Eric Kok, kende e temporada ei tabata teamchef na RST. Gert Rip a bisa bon kla ku, Eric Kok a papia ku Helmin Wiels pero nan kombersashon no tabata pa papia riba un grupo di kriminal. Si e dos hòmbernan no a papia riba e grupo di kriminal, ku tabata bende oloshi hòrta na Jorge Jamaloodin, anto no a keda nada otro ku Wiels i Kok a traha un dil pa logra pone Kok komo konsehero di Nelson Navarro den kabinete Asjes, kual kabinete a huramentá riba 7 di yüni 2013. No tin NIUN otro alternativa, pasobra ámbos hòmber lo no tin niun motibu di papia ku otro òf bai bebe kòfi den un studio di radio riba Caracasbaaiweg. Kade Wilsoe durante e dokumental 5 di Mei 2013, a deklará ku segun Wiels, Kok tabata bini serka dje pa Kok haña un posishon komo konsehero. Dos ruman di Helmin Wiels ta konfirmá tambe ku nan ruman a papia ku e ulandes den kual unu di nan a splika ku nan tambe a deskonsehá Wiels di no hasi esaki. Riba sitio di stashoná outo na supermerkado Centrum Piskadera un familiar ta splika kon un alto hefe di polis a bini serka dje i bis’é pa bisa Helmin stòp di papia ku RST. Lokual ta importante ta e konfirmashon di Rip entre 6 pa 12 di yüni 2019 den kortenan na Willemstad: “nan a papia, pero no riba un grupo di kriminal”. Pues no a keda nada otro di konkluí ku Wiels a papia ku Kok di RST! Wiels a tene e kòmbersashonnan sekreto pa su konseheronan, sirkulo polítiko i hasta su “think tank”. Pero Kòrsou ta chikitu, i e kosnan sali robes p’e lider máksimo di Pueblo Soberano.

Helmin Wiels tabata esun kende a lobi pa Eric Kok, despues di tabata teamchef na RST, bira konsehero di minister di hustisia. E la logra esaki, dor di a papia na diferente okashon ku Kok unda Kok a splik’é di ta deseá na keda mas largu na Kòrsou pa sigui yuda kombatí krímen organisá. Eric Kok, Jules Ilario i Wim van Vemde na inisionan di 2013, tabata e 3 pilarnan ku Ulanda tabata stens riba dje pa kombatí krímen organisá i solushoná formashon di gengnan kriminal na Kòrsou. Huntu ku nan Gert Rip, tabata e hòmber den Ministerio Públiko. Pa tal, motibu nunka Gert Rip, kende solushoná tur dos trapi di Magnus i Maximus, lo por divulgá den korte riba kiko realmente Wiels i Kok a papia. Kok a bai serka Wiels pa e por konfirmá su estadia na Kòrsou i drenta komo konsehero di kabinete Asjes na yüni 2013. Helmin Wiels entretantu a pone Kade Wilsoe un banda, komo posibel kandidato pa bira minister di hustisia. Wilsoe, pa Wiels no tabata un kandidato mas, prinsipalmente p’e motibu ku Pueblo Soberano a bai di akuerdo pa Wilsoe, temporada e tabata minister di hustisia den kabinete Schotte, e manda un karta Estádos Unídos pa trese 50 mion dòler di Robbie Dos Santos bek Kòrsou. Si Wiels a bolbe pone Wilsoe komo minister, esaki lo a mancha Pueblo Soberano di tabata kómplise ku MFK den nan intenshon di trese plaka di Dos Santos konfiská na Estádos Unídos. Wilsoe a sinta mira kon Helmin Wiels a laga Partido PAIS i Alex Rosario bai ku su puesto komo minister di hustisia. Nelson Navarro, a drenta komo minister di hustisia den e kabinete di profeshonal i sigui komo minister den kabinete Asjes na yüni 2013, algun siman despues ku Helmin Wiels a fayesé.

Eric Kok, ta un eksperto ulandes den kombatimentu di krímen organisá i un individuo super inteligente den investigashon. Ademas, e sa bisti unifòrm militar tambe ora tin mester. Kok, no ta un kabouter den e organisashon di inteligensia ulandes na Kòrsou. Despues ku Helmin Wiels a fayesé, Wim van Vemde a bira teamchef na RST i a sigui manehá e unidat ku e yu di Kòrsou Jules Ilario, kende tabata konosé Jorge Jamaloodin via dje mundu di farándula na Kòrsou.  Eric Kok a bira e promé konsehero ulandes di Nelson Navarro. Kok a drenta Punda i Navarro te awe no sa ta ken a pone Kok einan. Pero, promé ku Eric Kok a bira konsehero di Nelson Navarro na yüni 2013 i morto Wiels na Mei 2013 a tuma lugá, un grupo di kriminal ya a disidí di asesiná Helmin Wiels. Wiels tabata determiná pa bringa krímen organisá i yuda kibra e relashon entre eksponentenan di MFK ku gengnan kriminal ku tabata tira atrako riba bara di oro, oloshi hòrtá i partisipá den ekstorshon i menasa kombiná ku trafikashon di droga. Pa tal motibu tabata Helmin Wiels kende a pusha pa pone Kok einan.  Wiels tabata sa ku RST tei subi tras di Jorge Jamaloodin, pasobra el a menshoná esaki na radio. Wiels a kanta aresto di Jamaloodin, pasobra e tabata sa ku RST ta investigando Jamaloodin.  Un lèk den RST a pone Wiels na altura, ku e ulandesnan ta bai plama geng di oloshi i bara di oro i alabes pone Jorge Jamaloodin tras di trali. Wiels tabata asina sigur, ku el a menshoná aresto di Jorge Jamaloodin, no pa su morto, sino pa kompra di oloshi hòrta i pagamentu na Nini Fonseca.

(Lo kontinuá).