Estádos Unídos ta buska solushon pa krísis di Haiti pa ku e presidente Moise

120
E representante di Estádos Unídos huntu ku e presidente haitiano.

PORT – AU – PRINCE – E supsekretario di Estado pa Asuntunan Polítiko di Estádos Unídos, David Hale, ta di bishita na Haiti. Aki ta unda el a mantené un enkuentro ku e presidente di e pais, Jovenel Moise, pa asina buska un solushon pa ku e krísis polítiko, ekonómiko i sosial ku e nashon karibense ta bibando.
Durante di e enkuentro, e mandatario a ekspresá na Estádos Unídos, ku e ta habrí pa dialogá ku tur sektor pa asina por logra regresá pas na Haiti. Ademas di esaki, el a publiká tambe riba su kuenta di Twitter, ku e inisiativanan pa logra yega un solushon pa e krísis ta oumentando.
E agènda di e funshonario estadounidense na Haiti, ta inkluí ademas reunionnan ku e minister di Eksterior, Bocchit Edmond, i ku otro lidernan polítiko.
Hale a yega den oranan di ayera mainta na Port-Au- Prince, for di Nassau, Bahamas, unda el a reuní ku e promé minister, Hubert Minnis i otro outoridatnan pa diskutí e apoyo di Estádos Unídos pa ku rekuperashon despues di orkan Dorian.
E bishita di e funshonario estadounidense a keda produsí na un momentu di kalma relativo, despues ku mobilisashonnan i protestanan konvoká pa oposishon pa eksigí e renunsia di Moise. Ta trata di protestanan na hopi okashon violento, ku for di mei mei di luna di sèptèmber, a laga míles di personanan subi kaya na Port-Au-Prince i otro siudatnan.
Den oranan di siman pasá tabatin un konsentrashon tímido dilanti e Embahada di Estádos Unídos na e kapital haitiano, pa di e forma aki pidi Donald Trump pa retirá su apoyo for di e presidente haitiano.
Na vários okashon, Moise a pidi pa kòmbersá ku oposishon, pero ta rechasá kualke posibilidat di dialogá apesar ku e representashon diplomátiko di vários paisnan na Haiti, inkluyendo Estádos Unídos, a pidi na diferente okashon pa kòmbersá.
For di luna di mart di e aña aki, ku destitushon di e promé minister Jean Henry Céant den un moshon, Haiti no tabatin un gobièrnu funshonal i a move elekshonnan, kua tabata planiá pa luna di òktober último.
Apesar di e aparente kalma i ousensia di movementu i protestanan intenso ya pa tres siman, e krísis ta kontinuá i e movementunan lo por lanta kabes bèk na kualke momentu. Sigur tumando na kuenta ku e problemanan struktural ainda ta sin resolvé.