ERA ta bai graba un potpuri di diferente Tumba di Nildo Martis

396
Awe e ta bai graba un potpuri dediká na dft Nildo Martis.

WILLEMSTAD,—-Ayera den ora nan di atardi ‘E Mulina’, a haña informashon ku agrupashon musikal E Rei nan di ambiente ku ta E.R.A. riba e dia di awe ta bai drenta den studio di grabashon pa asina nan bai graba un potpuri di diferente di e Tumba nan ku dft Nildo Martis a partisipá kuné den su karera.

Mas aleu ‘E Mulina’, a keda pone na altura ku agrupashon musikal E.R.A. lo ta kla promé ku entiero di e legendario kantante kompositor Tumbero ku djadumingu tras di lomba a pasa pa un mihó mundu, esaki sin duda ta un tremendo idea di músiko nan di agrupashon musikal E.R.A.

‘E Mulina’,tin informashon ku Reinier Lijfrock sigur lo bai kanta e potpuri di Tumba nan di dft Nildo Martis. Tambe mester bisa aserka ku dft Nildo a partisipá ku agrupashon musikal E.R.A. na tres okashon kaminda ku na tur tres okashon e la sali den e mihó 10 nan. Ta trata aki na aña 1998 ku e komposishon “Ei bou ta Kòrsou” kaminda ku e la sali di 5 finalista. Na aña 1999 e la sali di 4 finalista ku e Tumba “Ban mustra mundu” i na aña 2000 e la kanta “Ta deseo di pueblo” i aki nan e la sali di 8 finalista. Esaki sin duda ta nifiká ku tur Honor i Amor mosaiko nan di agrupashon musikal E.R.A. i e kantante Reinier Lijfrock lo bai drenta den studio di grabashon ku nan Kurason limpi i bunita. I dediká esaki na e legendario kantante kompositor Tumbero ku ya no ta huntu ku nos mas riba e mundu aki ku ta Nildo Martis.