Un videoclip di Viva Kids  pa e temporada festivo

250
Nan tin un videoclip ku sigur lo bai hala bastante atenshon.

WILLEMSTAD,—-Ku hopi orguyo VivaKids Recycleband a hasi lansamentu ofisial di e videoclip di nan kansion pa e temporada di fiesta aki, “Ku Pashon”, ta un piesa karga un mensahe profundo di perseveransia i speransa di adelanto pa Kòrsou kual ta sali for di kurason di  kada integrantenan i lidernan di Viva Kids.

E piesa “Ku Pashon” ta un gaita kompositá i areglá pa e artista multitalentoso, Omar Sling. E mensahe prinsipal tras di e kantika aki ta, pa motivá i empoderá kada Yu di Kòrsou pa nos ban traha huntu pa asina logra adelanto di nos pais. Kòrsou tin tur e potensial pa logra kosnan eksepshonal apesar di kon tiki nos tin kisas na nos alkanse.

E banda Viva Kids ta un ehèmpel puru di esaki, ku bleki, sobrá di fèn i otro artefaktonan desechabel, e muchanan aki kada bes di nobo a bin ta logra trese dushi músika ku a sa di move grandi i chikí.
Di mes manera nos tambe por uni i harmonisá nos abilidat i talentonan pa asina logra lo máksimo pa Kòrsou. Si kada un di nos duna tur loke nos tin i hasi e loke nos por ku pashon, Kòrsou lo logra sigur.

Mas ku klaro Viva Kids lo no ke laga e oportunidat aki pasa sin gradisí i mustra nos mas sinsero apresio na Aqualectra i kada persona ku a hasi e videoclip aki posibel, tantu finansieramente komo dor di a kontribuí ku nan talento di un òf otro forma. E meta ta, pa sigui desaroyá, kontribuí i invertí den e muchanan aki durante 2020 tambe, ya asina mañan nan por ta bon ekipá. Pues si bo tambe ta kere ku bo por aportá na kresementu di e simianan aki i bo ke bira un Amigu di Viva laga nos sa na 511-8202 òf 692-9533 i nos lo splika bo kon bo tambe por bira un amigu di VivaKids.