“Ta spekulashon pa hasi notisia hòt”

216
Cali Manuel hibando palabra, huntu ku demas miembro di e direktiva nobo di Centro Barber.
WILLEMSTAD—“E loke e korant a skibi no ta bèrdat. Ta spekulashon pa hasi kos hòt i duna futbòl un push i ta duna notisia pa kos kana, manera hende nan ta bisa. Emanuel ta hopi bon i será bèrdat ku e hendenan di Barber, pero nos ta kere den krioyo.  Anto si nos buska mes, nos lo buska un delantero pa hinka gol i no un bolante”, tabata komentario di ‘Cali’ Manuel, kende ta presidente di Centro Barber ayera, durante di su edishon di notisia mèrdia, na e media ku e ta laborá.

Esaki algu despues di tabata den un kombersashon telefóniko ku bo sirbidó. Un ke otro unda e la yama, pa reakshoná riba un publikashon di ayera, unda Deporte Vigilante a relatá di aserkamentu di un miembro di Barber, na un òf mas futbolista latino ku ta praktikando ku Undeba.

Tabata un kombersashon, ku diferente deklarashon kontradiktorio, unda ‘Cali’ a sigurá i konfirmá ku ningun hende di Barber, no a aserká e futbolista Emanuel.

Pues señor presidente a menshoná asta nòmber, sin ku Deporte Vigilante a splika ta ken òf kua hungadó presisamente e miembro di direktiva di su ekipo (ku Deporte Vigilante inkluso tin su nòmber), tabata den kontakto ku kuné.

“‘Cali’ bo ta papiando pa bo mes, òf pa hinter Barber ?”, Deporte Vigilante mesora a puntra, unda e kontesta tabata “Pa hinter Barber, paso Barber kompletu bèrdat ta bon ku Emanuel, pero niun hende no a aserk’é pa e bin serka nos. Es mas nos a tuma 3 hungadó di Undeba kaba i segun regla falta un mas, ku lo bira Naar”, Manuel a konkluí, ku un splikashon no muchu kla, pero si kier a splika ku nos publikashon no tabata korekto.

Esaki unda entre otro si dado kaso mes mester transferí e futbolista(nan) latino,ku esakinan sigur lo no bira un transferensia for di Undeba, pa motibu ku nan dirigente mes a splika e futbolista, ku Barber si por regla, pa e transferensia for di eksterior pa Barber, por kana rápidamente pa nan por ta den akshon ku Centro Barber.