Algun músiko di HYPE a laga Braien Wawoe i Itel Martis su kara lastra bou

357
E la keda hopi desapuntá ku algun musikal di HYPE.

WILLEMSTAD,—-For di wikènt tras di lomba ‘E Mulina’, a bin ta tuma nota ku tin un kambio rondó di Festival di Tumba Hubenil. E kambio ta ku na lugá di agrupashon musikal HYPE a drenta e formashon musikal Dolce Banda.

Esaki mes ora a hala nos atenshon i esaki a pone ku ‘E Mulina’, a drenta den kontakto ku Rich Pieter, pa asina nos tende kiko por a bai robes ku diripiente tin un kambio di banda pa kompaña 6 kantante den Festival di Tumba Hubenil.

Asina ku ‘E Mulina’, a haña kontakto ku Rich i mes ora nos a puntr’é di e kambio ku nos a bin ta tuma nota di dje. Mester bisa ku den mes un rosea Rich a konta ‘E Mulina’, kiko a pasa ku su organisashon a hañ’é na kareda pa sera e buraku ku nan a haña nan kuné.

Rich a bisa ‘E Mulina’, ku for di prinsipio tur kos tabata bon regla, pero den luna di desèmber e la haña di komprendé ku algun músiko no ke kompaña e kantante nan pa e preis ku nan a bai di akuerdo kuné na promé instante. Mas aleu Rich a bisa ku Braien Wawoe a hasi tur kos di su banda ta asina HYPE por a kumpli ku loke nan a palabra, asta Braien a perkurá pa Itel Martis ta esun ku lo a kordiná tur kos, pero tòg algun músiko di HYPE a laga tantu Braien i Itel su kara na bèrgwensa, e músiko nan a para ariba ku nan no ta toka pa tiki sèn, esaki a pone ku Rich a hañ’é na kareda i e la logra, mes ora e la aserka Clepo di Dolce Banda i nan a yega na un akuerdo ku otro. Pues awor ta Excellence i Dolce Banda ta bai kompaña e 12 kantante nan dia 18 di yanüari ku ta otro siman djasabra.