Kabesante nan di ICONS a bai mesa ku Clinton Hato

6337
E ta hopi den notisia e dia nan aki.

WILLEMSTAD,—-Tin algun moveshon ta tumando lugá den un forma kuchi, kuchi den nos farándula lokal. Pero tòg esaki nan ta kana yega na mesa di redakshon di ‘E Mulina’,. T’asina ku nos a keda pone na altura ku kabesante nan di agrupashon musikal ICONS a bai mesa ku e popular kantante Clinton Hato.

‘E Mulina’, a keda pone na altura ku kabesante di e banda ariba menshoná a sinta ku e kantante Clinton Hato i nan a pone un bunita oferta riba mesa, pero e kantante en kuestion no a kome riba e oferta ku nan a pone su dilanti.

Mas aleu nos fuente a bisa ‘E Mulina’, ku asta kabesante di ICONS a puntra e kantante ariba menshoná kuantu nan a ofresébu i ku nos por dòbel esaki, aki tambe nan a haña di tende NO. Den mes un rosea ‘E Mulina’, a haña di komprendé ku e kantante a bisa nan ku den GENTZ TRE’CHIC e ta sintié 100% na kas.

Ku e moveshon aki ‘E Mulina’, a kuminsá pensa ta kua kantante ta den plan di bandoná agrupashon musikal ICONS, òf nan ke hasi nan front ku sinku kantante. Ayera ‘E Mulina’, a yama Clinton Hato, pero pa nada di mundu e no a kue nos telefon, mas despues nos a yama un di e kabesante nan di ICONS, pero esaki su telefon tabata zona paga.