KLM no ta bula riba Iran i Irak mas

74
mas medidanan di seguridat debí na tenshon internashonal
SCHIPHOL—KLM no ta bai bula mas riba Iran i Irak, asina e kompania a disidí den un konsulta di seguridat.

Debí na e desishon vuelonan ku destinashon suit-ost Asia i Medio Oriente mester desviá. Esaki ta kondusí na retrasonan di 10 pa 12 minüt. Ta trata di algun desena di vuelo segun e bosero. Ayera nochi Iran a lansa misilnan riba dos base militar na Irak komo vengansa riba e likidashon di general Soleomani pa merikanonan siman pasa. E daño no ta konosí. Mas aleu un vuelo di pasahero di Ukraina a kai den kapital di Iran, Teheran kaminda 176 persona a pèrdè nan bida. No ta kla si e aksidente ta relashoná ku e tenshon kresiente entre Iran i Merka. Otro kompanianan di aviashon tambe a anunsiá medidanan. Asina International Airlines di Ukraina a kanselá tur vuelo pa Teheran. Esaki ta doño di e avion ku a aksidentá. Lufthansa tambe a kanselá vuelonan entre Alemania i Iran. Pa motibu di tenshonnan internashonal kompanianan di aviashon merikano tampoko por bula riba Iran i Irak riba orden di FAA.