20 persona ta fayesé den aksidente di bùs registrá na Iran

63
Forma ku e bùs a keda despues di e aksidente den kua vários personanan a pèrdè nan bida.

TEHERAN – Un total di 20 persona a pèrdè nan bida i otro 23 mas a resultá heridá den un aksidente di bùs na un karetera di montaña ost di Iran.

E direktor general di Transporte via karetera di e provinsia di Golestán, Mehdi Miqaní, a informá ku e bùs a sufri un fayo tékniko ku su brek nan i a aksidentá pa e motibu aki.

E bùs, di marka Scania, tabata sirkulá na e karetera di Firuzkuh i tabata kubri e ruta entre Teheran i Gonbade Kavus, na Golestan.

Dòkternan forense di e provinsia di Mazandarán, unda a registrá e insidente, ta identifikando e víktimanan mortal. Entre esaki tin tambe e shofùr di e vehíkulo i un total di nuebe ta hende muhé, un di nan tabata na estado.

E aksidentenan di tráfiko ta poko normal na Iran, unda e kantidat di mortonan registrá pa via di aksidentenan riba kaya, ta un di esnan mas elevá di mundu, ku masoménos 20 mil morto kada aña di nobo.

Hopi di e aksidentenan aki ta debí na e estado defisiente di e vehíkulonan òf na skarsedat di kumplimentu di reglanan di tráfiko pa e shofùrnan.