Hendrik De Windt ta kompositor di Ray i Dwight Leoneta ta su areglista

197
Mester tene hopi kuenta kuné den tumba 2020.

WILLEMSTAD,—-Ya algun dia tras di lomba ‘E Mulina’, a bisa ku “E chèns ta hopi grandi ku e tres bes Rei di Tumba Hendrik De Windt lo ta e kompositor di Ray Lauffer pa Tumba 2020.

Mester bisa ku dia e informashon a sali ta masha hopi hende a bisa ku loke ku a sali den Korant Vigilante no ta kuadra ku realidat, pero manera semper nos a bin ta bisa ku “Tempu ta e mihó maestro”. Djamars tras di lomba ‘E Mulina’, a haña informashon ku kontrakt a wòrdu firma entre ámbos persona.

Pues awe nos por bisa ku 100% Hendrik De Windt ta e kompositor pa Ray Lauffer i Dwight Leoneta ta su areglista. E kombinashon forma pa Hendrik i Dwight a yega di traha ku otro kaba den pasado den festival di Tumba, pues nan dos konosé otro di paden i di pafó. Esaki ta loke ku ta bai hasi nan trabou mas fásil pa e kantante Ray Lauffer. No tin duda ku e aña aki lo bai tin bastante atenshon riba e presentashon di Ray Lauffer den Tumba 2020 su di 50 edishon, paso na aña 2018 e la sali promé finalista ku un komposishon di Amos Balentin i aña pasa e ta ripití komo promé finalista,pero ku un komposishon di Axel Pikero. Pues 2020 por bira e aña di historia di Ray Lauffer su partisipashon den Tumba 2020.

I si dado kaso esaki  Ray bira Rei di Tumba Hendrik De Windt ta bira e di dos Rei di Tumba ku su komposishon ta Korona un otro Rei di Tumba. Esaki a pasa na solamente un okashon i esaki tabata na aña 1982 ku Rene Samson ku a sali Rei di Tumba na aña 1977 ku su mes komposishon, ta komponé un komposishon pa su ruman Luti Samson i Luti ta gana festival di Tumba na aña 1982 ku e Tumba “Kologá” den stadion di S.U.B.T. for di e tempu ei ku ta 38 aña pasa.