Sospechoso asesinato Martin kok detené na Italia

148
imágen di asesinato Kok
AMSTERDAM/TURIN—Polis a detené e sospechoso di asesinato riba Martin Kok, den un hotel na Italia.

Ta trata di Christopher Hughes (29) ku a keda detené riba petishon di hustisia eskosia. Prensa italiano a bisa promé ku ta trata di Rustanovs, pero entretantu a konfirmá ku ta Hughes. E tabata keda den un hotèl na San Mauro Torinese, no leu for di Turin. Polis a haña e hòmber durante un kontrol. E tabata registrá komo Hughes, ku tabatin un orden di aresto oropeo emití pa outoridatnan eskoses relashoná ku un investigashon grandi riba trafikashon droga i arma internashonal i tambe pa asesinato di Kok. Na Hulanda Hughes ta sospechoso relashoná ku asesinato di Kok. Hughes tabata un spònser di e website Vlinderscrime di Kok. Polis ta kere ku Hughes lo a duna orden pa likidá Kok. E tabata e hòmber ku Kok a topa desèmber 2016 den un hotel banda di Amsterdam-Zuid. Imagennan di kámara a registrá kon un hòmber a purba mata Kok, pero e arma a faya. Mesun anochi nan dos a bai Naarden kaminda Kok a keda asesiná despues di e bishita na un klup. Hughes a sali djis despues i hui na pia. Mas lat el a mèldu na polis. El a bisa ku e anochi ei el a keda serka un amigu na Amsterdam.