Torneo FABB 2020 ta sigui awe ku 2 wega

128
Akshon den wega di Torneo FABB 2020.
WILLEMSTAD—E ya tradishonal anual torneo di beisbòl, ku ta hunga komo promé torneo deportivo di aña riba nos isla, Torneo FABB 2020, ta sigui awe, ku konforme e skema 2 wega. Ta trata aki di e torneo di beisbòl pa nos hóben peloteronan, den kategorianan Minor i Little League, organisá pa Akademia Baseball Brievengat.

Pa aña 2020, esaki ta den su di 23 edishon i ta hungando un biaha mas riba terenonan di Suvek Ballpark. E fin di siman aki lo bira e di 2 fin di siman i mesora tambe e penúltimo fin di siman di e torneo ku ta programá pa finalisá otro siman djadumingu dia 19 yanüari 2020, kual ta dediká na David Pinto (q.e.p.d.), kende tabata un di e trahadónan inkansabel pa e organisashon, sigur durante di e torneo aki.

Tur esaki despues ku djarason último tambe tabatin 3 wega ku a mira akshon, debí ku tantu djaluna komo djamars tabatin weganan ku a keda posponé, debí na mal estado di tereno. Un ke otro debí na e fuerte yobida ku nos isla a konosé na inisio di e siman aki.

Resultado di e weganan di djarason último:

Kategoria Minor

Trai Seru       –           Sta Rosa                    9-4

Sta Maria 2  –           Jandoret                   6-3

Kategoria Little League

Sta Rosa        –           Jandoret                   12-11

Weganan ku lo hunga awe na Suvek Ballpark:

17.30             Trai Seru                   vs        Jandoret                   (Minor)

19.30             Brievengat-B            vs        St. Michiel                (Little)