Uruguay ta sigui invikto den futbòl na Boneiru

145
Cesar Altamirano, kende a anotá pa Uruguay.
KRALENDIJK—E kampionato di futbòl na nos hermana isla Boneiru a kontinuá djarason último, ku wega ku a mira akshon den stadion Antonio Trinidat na Rincon. Ta trata di enkuentro ku a duna kontinuashon na e kampionato 2019/2020 organisá pa Federashon Futbòl Boneriano.

Un ke otro, na momentu ku e ekiponan di Uruguay i Juventus a enfrentá otro.

Esaki tabata e di 26 partido di temporada, kual a finalisá empatá na 1 gol.

Tabata enkuentro, den kual e ekipo di Uruguay, a sa na dominá un tiki i ta logra habri e anotashon, hungando 40 minüt den e parti inisial, pa asina sosegá den bentaha mínimo.

Cesar Altamirano, tabata esun kende a anotá pa e ekipo di Uruguay.

Seguidamente den e parti komplementario, tabata despues ku Juventus a sali desidido en buska di e gol di empate, ku nan ta bin logra esaki, hungando 85 minüt den e partido.

E number 10 di e ekipo, ku a hunga den un di su 3 unifòrmnan nobo ku nan a presentá durante di e promé dianan di aña, Jandino Frans, kende ta logra e gol di empate pa Juventus.

Seguidamente ámbos ekipo a trata pa por yega na e gol di triunfo, pero sin e resultado deseá. Esaki a pone ku nan mester a konformá ku e empate di 1-1 i 1 punto.

Ku e resultado aki, e ekipo di Uruguay, ta sa na mantené su invikto, miéntras Juventus ta keda sin triunfo pero ta optené nan di 2 punto den aktual kampionato.

E enkuentro a hunga dilanti di 97 persona, ku a paga pa mira esaki, ku tabata repartí den 29 fanátiko 60+ i 55 otro adulto i 13 mucha.