Dos morto i kuater herido registrá den atake ku arma di kandela na skol

58

CIUDAD DE MEXICO – Un alumno a tira ku un arma di kandela na un skol privá di e siudat di Torreón, Coahuila, na nort di Mexico, ku saldo preliminar di dos morto i kuater herido.

E echonan aki a sosodé na e Colegia Cervantes del Bosque, na alrededor di mitar di nuebe di mainta.

E kordinadó di sekretaria di seguridat públiko di e estado di Coahuila, na e region di Laguna, a señalá ku tin dos persona ku a pèrdè nan bida den e tiroteo, inkluyendo un maestra i e supuesto responsabel di e tirunan, un alumno di 12 aña di edat.

E alkalde di Torreón, Jorge Zermeño, a konfirmá ku un mucha hòmber a yega na e skol ku dos arma di kandela den su poder i a lòs bala kontra un maestra i algun kompañero.

Loke a hala atenshon den e kaso aki ta ku e hóben responsabel di e kaso aki, no ta un hóben ku tin ningun klase di problema pa ku komportashon i ku kontrali, ta un hóben ku no ta duna niun klase di problema na e skol.