E siklista Remco Evenepoel (19) lo debutá den ‘Giro d’italia’

60
Remco Evenepoel lo debutá den ‘Giro d'italia’.
BELGIKA – E siklista Remco Evenepoel di 19 aña di edat, un prospekto pa loke ta e deporte di siklismo na Bèlgika, lo partisipá den e famoso ‘Giro d’italia 2020’. Esaki lógikamente lo bira tambe su debut den un kompetensia di siklismo di tal magnitut.

Tabata pa medio di e korant italiano, La Gazzetta dello Sport, ku e siklista di Bèlgika a anunsiá su partisipashon. “Pa basta tempu mi tabata soña ku e momentu aki. Mi ta ansioso pe dia yega pa kaba.” E echo ku e siklista Evenepoel lo kompetí den Giro no ta un sorpresa grandi.

Ta for di aña pasa tabatin rumornan fuerte i tabata spekulá ku e posibilidat aki. Segun e propio Evenepoel e Tour si ta poko riba man i no ta kuadra aktualmente ku e soñonan olimpiko di e siklista di e ekipo Deceuninck-Quick.Step. Pues esnan ku a sobra ta  ‘Giro d’italia’  i ‘Vuelta a España’.

“Te ku awor aki ma partisipá na kompetensianan ku un máksimo di 9 dia di kareda. Giro ta kuadra perfektamente den mi plan ku mira riba weganan olímpiko. Aki ta e kareda kontra oloshi ta e gran meta”, asina Evenepoel a deklará.