Jong Holland ta reakshoná ku 2 gol den último 10 minüt

218
Akshon durante di e wega entre Jong Holland i Centro Barber.

WILLEMSTAD—Djabièrnè dia 10 yanuari 2020, tabata fecha ku e kampionato di futbòl FFK, su temporada 2019/2020 a kontinuá. Esaki ku e promé partido pa aña 2020, despues di algun siman di paro, debí na fiestanan di selebrashon di dianan di Pasku i kambio di aña.

Tabata hustamente e dos ekiponan mas ariba, riba e tabla di posishon ku a enfrentá otro den wega ku a hunga den Stadion Ergilio Hato na Brievengat.

Un ke otro unda ku rèfri Javier Jauregui a dirigí, ku asistensia na liñanan di Isenia i Wilson, miéntras ku Adelina tabata e di 4 ofisial di wega.

E trikolornan di Jong Holland, dirigí pa Lennox Mauris, a enfrentá e ekipo dirigí pa Marc Muzo, kende ayera tabata ousente, Centro Barber.

E partido aki a finalisá empatá na 2 gol, despues ku tabata Centro Barber ku a sosegá den bentaha mínimo i seguidamente tabata ariba 2-0.

Rogyaer Anita a habri markadó na di 33 minüt di wega, pa pone Barber den bentaha di 1-0.

Ya hungando na di 7 minüt den e parti komplementario, tabata Fransjelon Andrea, kende ta oumentá e bentaha pa Centro Barber, na 2-0.

Sinembargo nan no ta logra mantené esaki, despues ku entre otro for di na di 11 minüt di e parti komplementario, nan mester a sigui ku 10 hungadó, despues ku Timothy Susanna wòrdu ekspulsá despues di risibí su di 2 karchi hel di anochi.

Jong Holland ku no a entregá, ta bin anotá na 2 okashon, durante di e último 10 minütnan di wega, pa asina mantené nan invikto, kedando na promé puesto i ta regresá kas ku 1 punto. Primeramente tabata Jurensley Martina, ku ta kòrta nan desbentaha na di 80 minüt di e partido i finalmente den pitu, ora ya kasi tabata sperando e pitaso final, ku Jean Gaspard Baptiste ta sòru pa e gol di empate, for di un tiru penal.

Ku e resultado aki, Jong Holland ta keda na promé puesto i Centro Barber ta keda nan tras na segundo puesto.