Koredó di máratòn Wilson Kipsang di skòrs pa tempu indefini

50
Wilson Kipsang a keda di skòrs pa tempu indefini.
KENIA – E atleta keniano koredó di máratòn, Wilson Kipsang di 37 aña, por lo pronto lo ta di skòrs i no por kompetí den niun evento. E èks doño di e rèkòrt mundial riba e distansia di máratòn lo a kibra ku e reglanan mará na uzo di doping.

Esaki ta loke ku e Unidat di Integridat di Atletismo, un instansha independiente ku a keda lantá pa e federashon World Athletics (IAAF anteriormente), a informá na prensa ayera. Aparentemente Kipsang, di forma konsiente, lo a evitá di realisá e tèstnan programá for di e periodo di kompetensia i ademas e lo a manipulá ku muestranan tambe.

Na 2013 Kipsang a logra kibra e rèkòrt mundial di máratòn na Berlin registrando un tempu di 2.03.23. Tambe e la sa di logra viktoria durante e máratòn di Londen i esun di New York. Durante weganan olímpiko na Londen 2012 e la logra e medaya di bròns riba e disiplina aki. E rèkòrt personal di Wilson Kipsang di máratòn ta di 2.03.13, e di sesi miho tempu di historia.