Mo Farah a asentuá di no tin niun relashon ku Salazar mas

48
Mo Farah a bolbe asentuá su distanshamentu for di Alberto Salazar.
INGLATERA – E atleta Mo Farah un biaha mas a laga bon kla ku e no tin niun tipo di relashon mas ku su èks entrenadó Alberto Salazar, kende e aña tras di lomba a keda di skòrs pa kuater aña debí na e faltamentu ku reglanan anti dopahe.

“Si mi tabata sa mas promé di e loke nan ku Salazar a hasi, lo mi a bai lag’é inmediatamente. Pero e investigashon a dura kuater aña”, asina e kuater bia kampion olímpiko a deklará na BBC. Pa vários aña Mo Farah a trein serka e entrenadó merikano (eks koredó di máratòn) i durante e temporada aki a dominá riba e distansianan largu riba pista (5000 i 10.000 meter).

Tabata na 2017 ku Mo faraha ta bandoná e ‘Nike Oregon Project’, ku ta un proyekto kreá pa e propio Salazar. Tabata den e mesun aña aki ku e investigashonnan rondó di Salazar a start. For di dos aña promé e kadena di televishon britániko BBC a publiká un programa ku a relatá e aktonan dudoso ku Salazar lo tabata praktiká.

“Di bèrdat lo mi tabata deseá di por a haña sa mas promé. E situashon ta unu hopi frustrante”, asina Farah, ku ta spera ku e kaso aki lo no sigui pèrsiguié, a deklará. Nunka e tòp atleta britániko no e tèst positivo pa doping. Tabata despues di e kampionato mundial di atletismo na 2017 ku e la disidí di drenta kompletu den e mundu di máratòn, pero lo ke konkista su di tres título olímpiko riba e distansia di 10.000 meter na Tokyo.