Tiroteo ta laga tres morto i un herido atras na Guatemala

56
E outornan di e tiroteo a presentá riba un bròmer reportá komo hòrtá.

GUATEMALA – Un total di tres persona a pèrdè nan bida i un mas a resultá heridá despues di un tiroteo registrá den oranan di djabièrnè na nort di e siudat di Guatemala. Ta trata aki di un konfrontashon entre supuesto sikarionan i agentenan polisial di e pais.

E bosero polisial nashonal, Pablo Castillo, a splika na periodistanan ku e supuesto sikarionan a asesiná un hòmber den kaya, den oranan di ayera mainta, i posteriormente a keda ataká pa forsa di seguridat ku a presentá na e sitio.

Dos agente polisial tabata kende nan a tende zonido di arma di kandela i inmediatamente a reakshoná na e atake ku a kaba di keda registrá.

Segun e mesun fuente aki, e supuesto sikarionan a konfrontá e agentenan i a lòs bala riba esaki nan na nan yegada, unda ámbos partido a sa di heridá otro.

E delinkuentenan a keda transportá di emergensia pa e hospital San Juan de Dios, unda pa e gravedat di e heridanan durante e konfrontashon, nan a bin fayesé.

Outoridatnan no a identifiká e hòmbernan aki ainda, si a indiká ku esaki nan a presentá riba un bròmer, kua aparentemente ta un hòrtá, i un arma di kandela ku lachi ekstendé pa 20 tiru.

E Bomberonan Boluntario a konfirmá ku un muhé di aproksimadamente 35 aña di edat, identifiká komo Juventina Garcia Perez, a resultá heridá di bala na altura di su pia. Esaki aparentemente pa un bala pèrdí.

E edat di e supuesto sikarionan ku a fayesé ta entre 24 i 26 aña di edat.

Guatemala a konta den aña 2019, un total di 3578 kaso di homisidio, un promedio di kasi 10 persona asesiná pa dia.

E nashon sentroamerikano ta keda konsiderá huntu ku Hondúras i El Salvador, komo un di e dies paisnan mas violento di planeta. Esaki presisamente pa e kantidat di violensia registrá tur aña na e pais.

Solamente durante e último dékada, Guatemala a registrá homisidio di un total di 60 mil persona, mayoria asesiná ku un arma di kandela.