Café Barista a duna 225 bòter na “Voedselbank”

159
Algun di e pakete ku Voedselbank Kòrsou a entrega.
WILLEMSTAD – Un biaha pa luna, Voedselbank Kòrsou ta sòru pa algun instansha risibí 100 pakete di kuminda pa nan repartí bou di nan klientenan ku ta den nesesidat. Esaki Voedselbank ta hasi dor di haña yudansa finansiero serka diferente persona i kompanianan ku ta hasi donashon tur luna.

E paketenan ta keda repartí bou di organisashonnan sosial ku konosé e situashon personal di famianan ku ta den nesesidat. A base di nan konosementu nan ta hasi un selekshon di esnan ku tin mester di mas yudansa i asina un biaha pa luna nan ta risibí un pakete. E pakete ta konsistí di mas o ménos 20 produkto básiko ku ta suma 50 florin i ta pa un famia di 4 persona por usa durante algun dia. Algun di e produktonan ta aros, bonchi, te, sukú, pasta, berdura den bleki, cornflakes, cornedbeef i lechi. Den luna di yanüari, Voedselbank a risibí donashon di kòfi serka Café Barista pa hinka den tur e tasnan i asina hasi e famianan ku a risibí un pakete, aun mas kontentu.

Voedselbank ta spera di por keda haña donashon pa asina di forma gratuito, sigui yuda tur esnan ku ta den nesesidat.